El Sporting de Xixón venció al Getafe n’El Molinón gracies a un gol de Diego Castro. Ye la primer victoria del Sporting no que va d’añu, equipu que llevaba yá cuatro partíos ensin ganar.

Sporting: Juan Pablo, Lora, Botía, Iván Hernández, Canella, Rivera, Diego Camacho, Maldonado (Luis Morán m 65), Carmelo (Matabuena m 87), Diego Castro y Barral (Bilic m 76)

Getafe: Codina, Cortés (Kepa m 83), Cata Díaz, Mario, Torres, Boateng, Casquero, Pedro León, Adrián (Pedro Ríos m 70), Gavilán (Del Moral m 70) y Soldado.

La revista Formientu va presentar el númberu seis de la so trayectoría na Xunta d’Esritores Asturianos 2010. L’actu va celebrase nel palaciu Villa Madalena d’Uviéu, el martes 12 de xineru a partir de les 19:30 Nél, van entregase los gallardones del I Certame de Microrrellatos “Formientu” y va facese un recital d'autores mozos.

El Secretariu d’Organización de la Executiva del Partíu Asturianista, José Antonio Fernández Alonso, pidió qu’e 2010 la RTPA cumpla cola toponimia oficial d’Asturies, del mesmu mou qu’una mayor presencia de la llingua nel Ente públicu. Tamién, al traviés d’una nota de prensa, quixeron espresar el malestar de la organización cola “probe presencia de músicos asturianos nes gales de Nuechebona y Nuechevieya”.

El 39% de los llectores d'Asturies.com opina que la noticia más positiva del añu pa la nuesa llingua ye l’ésitu de la campaña “Doi la cara pola oficialidá” y la presentación de la semeya 10.000 de la iniciativa. Siguen-y mui de cerca, les dos col 23% de los votos, l’aprobación del nuevu reglamentu de la Universidá que permite l’usu del asturianu y la midida del Conceyu de Cangas de valorar los conocimientos del idioma propiu nes sos oposiciones.

El sindicatu Suatea vien de criticar al Gobiernu asturianu por abrir los colexos ya institutos l’ocho de xineru, “col gran gastu en calefacción, asina como’l de tresporte y comedor pa poner en marcha los colexos namás nun día ivernal”. Dende’l Sindicatu señalen que ye una actuación contra’l profesoráu y la comunidá educativa.

Los Verdes d’Asturies solicitaron a la Conseyería de Mediu Ambiente la suspensión de la caza en tol país mientres dure’l temporal de fríu y ñeve. Según la organización, con esti tiempu, los animales avérense a la franxa marítima facilitando la llabor de los cazadores.

El grupu de folk-fusión de Pola Ḷḷena La Coḷḷá Propinde, espubliza “A teyavana”, el so tercer trabayu discográficu. Ye un discu con 12 temes, onde se combinen los de reellaboración tradicional y los de composición propia del grupu, que van presentar el 29 de xineru na Fnac de Parque Principáu.

L’Aconceyamientu de Xuristes pol Asturianu vien de formalizar, énte’l Tribunal Superior de Xusticia d’Asturies, una demanda contra l’Alcuerdu del Conseyu de Gobiernu de la Universidá d’Uviéu, pol que s’aprueba’l Reglamentu pa la presentación y receición d’escritos en bable/asturianu, yá que, según l’asociación, contradiz la llegalidá y pon-y torgues al usu del asturianu nes comunicaciones cola Universidá.

El Grupu Municipal d'IX-BA del Ayuntamientu de Samartín del Rei Aurelio considera “una auténtica desvergüenza y un escándalu”, el retrasu de diez años na convocatoria d’una plaza de conserxe proveniente de la ufierta d’emplegu públicu de 2001. Del mesmu mou, van presentar una quexa a la Procuradora Xeneral pa qu’afale al gobiernu municipal a iguar l’actuación.

Más de 30 senadores pertenecientes a los grupos de CiU, la Entesa Catalana de Progrés, los Nacionalistes y el Mistu presentarán el próximu martes un documentu qu'ellaboraron conxuntamente de reforma del reglamentu de la Cámara Alta pa facer estensivu l'usu de les llingües oficiales.