El Grupu d’Ornitoloxía Maeva informa de la recuperación ecolóxica de la ría d’Avilés, que “foi ganando en vida, al empar que menguaben unos problemes y medraben otros”. Asina, rescamplen l’aumentu d’especies, pero señalen los munchos problemes ambientales que tovía esisten, “que faen que les grandes posibilidaes de la ría queden namás en dalgo potencial”.

El Bloque por Asturies del Nalón considera "inasumible" la falta de midíes ante'l temporal de los útlimos díes y cree que la Conseyería y los Conceyos "nun supieron tar al altor de les circunstancies xeneraes por un temporal previamente anunciáu". De la mesma manera, encamienta a les autoridaes a que tomen les midíes oportunes pa los próximos díes.

El Ministeriu de Comunicación de Marruecos entamó esti pasáu miércoles coles emisiones de “Tamazight”, la primer canal televisivu estatal n’amazigh. La emisora, que se pue sintonizar por TDT en too Marruecos, ta dientro de la ufierta xestionada pola Sociedá de Radiotelevisión de Marruecos.

El coleutivu antitaurín estatal vien d’entamar una iniciativa contra les subvenciones de los ayuntamientos a la tauromaquia. Poro, dende la páxina yotampoco.org, proponen que los ciudadanos cuelguen nun mapa por provincies la so semeya cola sida de refugar el maltratu animal.

La Comisión Constitucional del Congresu de los Diputaos aprobó güei xueves la nueva Llei Xeneral de la Comunicación Audiovisual. Colos votos a favor de PSOE, CiU y Coalición Canaria, la norma, qu’afita un nuevu marcu pal sector audiovisual, va permitir la emisión d’una canal autonómica fuera de les llendes de la comunidá.

La organización d'esquierda soberanista Fai! cellebrará esti vienres día 8 de xineru a les 19.00 hores una asamblea abierta na Casa la Cultura de Posada (Llanera). Según indiquen al traviés d’una nota de prensa, van tratar temátiques de tipu vecinal, escontra la especulación y el tren d'alta velocidá, pola defensa de la tradición cultural, rural, agricultura ecolóxico y pa aldericar al rodiu de la situación del idioma asturianu nel conceyu.

Voceros de decenes d'organizaciones sociales d'España, coordinaes con otros de la Unión Europea (UE) y América Llatina tacharon güei de "neocolonialismu" y de "espoliu" les "presiones" a les que la UE somete a los países del Sur pa que firmen los trataos comerciales promovíos dende la Unión.

El mediu d’información musical Fnast.net cumple un añu y pa celebralo entama un conciertu aniversariu’l prósimu vienres 8 de xineru. Les actuaciones de La Tarrancha, Black Panthys Party, La Patriband Folk Orl.lesta y 13 Palabras van ser les encargaes de poner son a la fiesta de cumpleaños. L’actu va ser nel Savoy de Xixón y xunto a los conciertos habrá sorteos, venta de material musical, una rifa la xata y música asturiana.

La Coordinadora Ecoloxista d'Asturies manifestó al Conceyu de Vilalviciosa la so oposición a que se vuelva abrir la industria estractiva n'Iris Solapeña, na parroquia de Fuentes, en Villaviciosa, per parte de Calizas de Villaviciosa.

Efectivos de Bomberos d'Asturies con base nel parque de Mieres estinguieron un incendiu que calicnó dafechu un horru asitiáu nle pueblu de  Ḷḷamas (Ayer). Según informaron los efectivos de bomberos, nun hubo persones afectaes y desconócense les causes qu'orixinaron el fueu.