La revista Formientu presenta’l númberu seis na Xunta d’Escritores

La revista Formientu va presentar el númberu seis de la so trayectoría na Xunta d’Esritores Asturianos 2010. L’actu va celebrase nel palaciu Villa Madalena d’Uviéu, el martes 12 de xineru a partir de les 19:30 Nél, van entregase los gallardones del I Certame de Microrrellatos “Formientu” y va facese un recital d'autores mozos.

Nesti númberu apaecen autores avezaos de la revista, amás de delles novedaes, como ye’l casu d’Abel Martínez, Daniel Estrada, Llucía Di Salvo León, fía d’emigrantes asturianos en Bonos Aires, y Manuel Fernández García, qu’escribe a comuña col so hermanu Jorge, habitual de Formientu. Amás de Javier Cayado Valdés, Benxa Pérez, Héctor Pérez Iglesias, Fran Melero «Frantxu» y Ricardo Candás.
 
Nesti númberu espublicen tamién los rellatos ganadores del I Certame de Microrrellatos Mozos «Formientu», que convocaron esti añu dende Xareos! y la editorial La Cruz de Grau col envís d’afalar la creación lliteraria y ayudalos a afondar nes sos posibilidaes creatives. A los rellatos que llevaron premiu o accésit, súmense los escoyíos pol xuráu pa la so espublización.
 
Los ganadores van recibir un premiu y diploma acreitativu nun actu que va celebrase al empar d’esta presentación. Nel mesmu va facese un recital, a partir de les 20 hores, nel que van participar: Pablo X. Suárez, Alejandra Sirvent, Abel Martínez, Frantxu Melero, Rubén Rey y Jorge Fernández García.
 
Formientu, asoleyada por Xareos! Xestión Cultural y la editorial La Cruz de Grau, entamó en 2007 buscando espublizar la obra de los autores más mozos de la lliteratura asturiana y dala a conocer. La revista ta dirixida por Inaciu Galán y el so Conseyu de Redacción ta formáu pol escritor Benxa Pérez y l'editor César García, coordinaos pola escritora y filóloga Laura Marcos. Formientu cunta con una ayuda de la Conseyería de Cultura d’Asturies.