Espaciu y Tiempu de la Llingua Asturiana

Proyectu Caveda y Nava

El proyectu Caveda y Nava ye una iniciativa d'ARAZ que tien l'apoyu de la Conseyería d'Educación, Cultura y Deporte del Principáu d'Asturies. El so oxetivu ye dixitalizar y facer que tean disponibles en formatu testu -na so fase inicial- los testos de tola lliteratura n'asturianu anterior a 1950.

 

Nel añu 2.000, na primer fase, entamó la introducción de testos d'autores incluyíos na recopilación "Poesías selectas en Dialecto Asturiano", del propiu Caveda y Nava, l'estudiosu y escritor asturianu que-y da títulu al proyectu y "Los Nuevos Bablistas", de García Rendueles.

 

Na actualización última incorporamos la totalid´ de testos en llingua asturiana o asturlleonés que s’alcuentren disponibles nel Biblioteca Virtual del Principáu d’Asturies. Ente ellos los llectores van poder atopar xoyes auténtiques de la tradición asturiana, como villancicos, poesíes, cartes, refranes o diálogos.

 

Yá tien na rede los primeros frutos d'esti trabayu y nos prósimos díes dirá viendo inclusiones nueves. Como pue; albidrar, esti proyectu básase na aplicación al casu de la lliteratura asturiana del conocíu mundialmente Proyectu Gutenberg.

 

Trátase de que l'estudiosu o la persona interesada nos testos asturianos pueda conocer y trabayar fácilmente colos testos más representativos de la lliteratura n'asturianu. Pa ello desarrollaráse un buscador por términos, autores y testos.

 

El Proyectu Caveda y Nava nun ye una base de datos d'autores, sinón una trescripción y dixitalización exhaustiva de testos. En toos ellos cítense les fontes y tolos testos tán incluyíos ensin tratamientu de nenguna mena. Nos testos nos qu'hebia delles versiones, intentaráse igualmente nun futuru ofreceles en llinia.

 

Pa esti proyectu escoyóse el nome de Caveda, n'honor a una de les figures más importantes na historia de la lliteratura asturiana. Xosé Caveda, nacíu en Villaviciosa en 1796, foi un continuador de los estudios asturianistes de los ilustraos. De so pá, Francisco de Paula Caveda, amigu y collaborador de Xovellanos, diz qu'heredó una bona biblioteca d'obres asturianes. Tuvo dellos cargos políticos na alministración del estáu, y dedicóse a estudiar la cultura asturiana dende munches disciplines (llingüística, historia, arte, lliteratura), pero destacó principalmente por ser l'autor de la primer recopilación d'autores n'asturianu, la Colección de poesías en dialecto asturianoque vio la lluz en 1839. Esta obra apaña la producción d'autores de los sieglos XVII y XVIII, polo que foi, coles reediciones posteriores, la fonte principal pa conocer la lliteratura astu riana d'esi tiempu. Xosé Caveda y Nava foi tamién un poeta d'importancia qu'influyó muncho na obra de los autores del sieglu XIX y bona parte del XX.

 

Noticies
Deprendi Asturianu
La Llingua Asturiana
Archivu oral
Proyectu Caveda y Nava

Cola ayuda de

Coneyería d'Educación y Cultura

Espaciu y Tiempu de la Llingua Asturiana
--Araz.net, © 2010. Tolos derechos reservaos.