Reinventando'l progresu: Más allá del crecimientu económicu n'Asturies

El sindicalismu n'Asturies, que tien tradición demostrada de compromisu y llucha, ta enfrentando’l desafíu de lliderar la transición hacia una nueva definición de progresu, una que vaya más allá de los parámetros tradicionales del crecimientu económicu y la producción industrial. Esta cuestión fundamental toca'l nucleu mesmu de lo que significa avanzar como sociedá: ¿Podemos, y debemos, siguir midiendo'l progresu solo en términos de crecimientu económicu y producción industrial?

La respuesta progresista y sindicalista a esta entruga ye un rotundu "non". Ye imprescindible ampliar la nuesa comprensión del progresu y del trabayu pa incluyir indicadores de bienestar social, equidá y sostenibilidá ambiental. Esti enfoque multidimensional del progresu reclama una economía que sirva a les persones y al planeta, en llugar de priorizar l’acumulación de capital y l’esplotamientu de los recursos naturales.

P’avanzar nesta direición, el sindicalismu n'Asturies necesita adoptar estratexes proactives y creatives. Esto inclúi la promoción de modelos económicos alternativos, como la economía circular, qu’enfaticen na reutilización y reciclaxe de recursos, y la economía del bien común, que prioriza'l bienestar humano y ambiental sobre'l beneficiu económicu. Asina mesmo, ye fundamental impulsar la innovación en sectores clave pa la transición ecolóxica, como les enerxíes renovables, y el turismu responsable. Toes estes ‘movíes’ nun pueden escaecese d’un sector perimportante pal nuesu futuru: la mocedá.

Verde y colorao

Una de les propuestes más valientes y al empar más necesaries pal sindicalismu asturianu ye la esixencia d'un amenorgamientu significativu de la xornada llaboral. Esta demanda, lloñe de ser una simple reivindicación de comodidá, tien una base sólida na busca d'un modelu de sociedá más equitativu y sostenible. Reduciendo les hores de trabayu, non solo se contribuye a una meyor distribución del emplegu y a una mayor conciliación familiar y personal, sinón que tamién se reduz el consumu enerxéticu y les emisiones contaminantes asociaes al sector productivu y al tráficu diariu.

L'enfotu del gobiernu del Estáu en trabayar esta cuestión nun ye otra cosa que'l marcu perfeutu pa que les agrupaciones sindicales asturianes faigan valir la so fuercia y lluchen por una reducción notable de la xornada y non la propuesta de mínimos, solo 2,5 hores selmanales, que se ta valorando.

Cuidar, esencia de cambiu

La llucha pola sostenibilidá tamién significa reconocer y reivindicar la importancia de los trabayos nel sector de los cuidaos, esenciales pa una sociedá equitativa y sostenible, y que tán infravaloraos y mal pagaos. Esti sector, con una gran presencia femenina, merez una especial atención na reestructuración de la economía hacia modelos mas xustos que reconozan la
importancia d’estos trabayos y que s’ocupen de les necesidaes d'unes de les trabayadores que más acosu y precariedá sufren nel so día a día.

Anovando’l futuru

Una de les mayores preocupaciones nel ámbitu sindical asturianu ye la decreciente afiliación de los mozos y moces. Les cifres son alarmantes; a pesar de la falta de datos actuales d'Asturies nel momentu de redactar esti artículu, a nivel estatal la participación xoven nos sindicatos ta mui perbaxo de les esperances (al rodiu'l 9 por cientu pa menores de 30 años). Esta tendencia reflexa un desafeutu creciente ente la xeneración más xoven trabayadora y les formes tradicionales de representación llaboral, apuntando a un abismu ente les esperances y realidaes de la llucha sindical más tradicional.

Enfrentar estes cuestiones, amás d'otres que nun pudimos abordar direutamente, ye imprescindible pa construyir el futuru d'Asturies que toos queremos. Una Asturies que seya un llar dignu, onde la vida seya valorada non solo polo que se produz, sinón pola calidá del so entornu y el bienestar de les sos habitantes. Ye la hora de trabayar pa facer una Asturies onde'l progresu sía midíu non namás en cifres económiques, sinón nel bienestar compartíu, na sostenibilidá y na equidá. L'emprestu de caún de nós hacia estos oxetivos va determinar l'Asturies na que viviremos mañana. Hai que ponese manes a la obra yá, pensando non solo en nós, sinón tamién nes xeneraciones futures, pa dexa-yos un llegáu de prosperidá, xusticia social y respetu pol mediu ambiente.

Hai camín.

Nacho Berdiales ye miembru de la Mesa Nacional d'Aína.