Xuristes pol Asturianu impugna’l reglamentu que regula les comunicaciones n’asturianu cola Universidá

|

L’Aconceyamientu de Xuristes pol Asturianu vien de formalizar, énte’l Tribunal Superior de Xusticia d’Asturies, una demanda contra l’Alcuerdu del Conseyu de Gobiernu de la Universidá d’Uviéu, pol que s’aprueba’l Reglamentu pa la presentación y receición d’escritos en bable/asturianu, yá que, según l’asociación, contradiz la llegalidá y pon-y torgues al usu del asturianu nes comunicaciones cola Universidá.

Según l’Aconceyamientu, l’Alcuerdu conculca dafechu’l principiu de xerarquía normativa, “yá qu’una norma inferior, nun pue amenorgar los drechos reconocíos n’otra superior, nesti casu la Llei d’usu y l'Estatutu”, señalen.
 
Pa l’asociación, la Universidá d’Uviéu tien de respetar el mandáu del artículu cuatro del Estatutu d’Autonomía d’Asturies y lo dispuesto nel artículu 4.2 de la Llei d’usu: “Tendráse por válidu a tolos efeutos l’usu del bable/asturianu nes comunicaciones de pallabra o per escritu de los ciudadanos col Principáu d’Asturies”.
 
Sicasí, según esclarien dende l’Aconceyamientu, el reglamentu universitariu namás permite los escritos n’asturianu empobinaos a los organismos xenerales, “colo que dexa fuera los que se quieran facer a los organismos de gobiernu de Facultaes y Escueles, Departamentos ya Institutos Universitarios d’Investigación, pente otros”, afiten
 
Amás, a xuiciu de l’asociación, solo tramitarán los escritos presentaos per comparecencia personal, “dexando fuera, por exemplu, los fechos pente medies de representante”. Del mesmu mou, si’l procedimientu s’entama d’oficiu, el ciudadanu afeutáu nun pue empobinase a la Universidá n’asturianu.
 
Según el nuevu reglamentu, va aceptase l’asturianu siempre que nun sían procedimientos complicaos, de tramitación urxente o de curtios plazos de resolución, talos como los relativos a reclamaciones eleutorales, solicitú de convocatories d’esame especiales o estraordinaries, reclamaciones escontra pruebes d’accesu a la Universidá, incidentes de recusación o cualquier otru que, peles razones espuestes, determine’l Rector.
 
A la fin, pa Xuristes pol Asturianu, nun se pue emplegar l’asturianu en cuasique nengún procedimientu alministrativu na Universidá. Polo que quier impugnar un alcuerdu que según los xuristes “ta empobináu a torgar l’exerciciu de dellos drechos llingüísticos proclamaos nuna llei y amparaos nel Estatutu”.

Contador Estadistiques