El diputáu del grupu parlamentariu socialista, Álvaro Álvarez, mostróse críticu cola actuación de la Sindicatura de Cuentes y aseguró que la mesma "tien munchu trabayu por facer", porque al so xuiciu "nun ta actuando con rigor, nin dando sensación d'independencia". "Dende'l PSOE queremos una Sindicatura independiente, que cumpla la llei, que se gane'l prestixu ante los asturianos y la cámara, y que tea exenta de presiones p'actuar con independencia", dixo Álvaro Álvarez.

L'Asamblea de la República francesa dio ayer el preste a la controvertida llei "Internet y creación", conocida tamién como "Llei antipiratería". Esta llei tien como oxetivu "lluchar conrtra les descargues illegales" y conseña la posibilidá de desconexón a la rede durante un periodu de trés meses a un añu a los usuarios que descarguen illegalmente conteníos suxetos a derechos d'autor. 

La Comisión de Cultura del Conceyu d'Avilés aprobó güei'l dictame de la toponimia de les sos seis parroquies, pueblos, aldees y barrios que de magar agora va considerase oficial. El documentu inclúi la reconocencia de la siguiente denominación pa les sos seis parroquies: Avilés, Miranda, San Cristóbano o San Cristóbal d'Entreviñas, San Xuan de Nieva, Navarro o Valliniello y La Madalena o Corros.

La Xunta Electoral Central ta acabante de proclamar les candidatures que van concurrir a les elecciones europees del próximu 7 de xunu. Del total de 37 llistes que van presentase a estos comicios, trés tan conformaes por partíos asturianos. Unidá Nacionalista Asturiana, Andecha Astur y el Bloque por Asturies, esti últimu en coalición con Izquierda Unida, tienen yá'l preste oficial y formen les candidatures asturianes nestes elecciones.

El Principáu d'Asturies y la Diputación de Lleón estudien la posibilidá d'unir les estaciones ivernales de Fuentes de Invierno y San Isidro pa crear la "meyor" infraestructura d'esquí del Cordal Cantábricu, una estación que "nun tenga nada qu'envidiar" a les dependencies ivernales de los Pirineos. Asina lo manifestó la presidenta de la Diputación de Lleón, Isabel Carrasco, al acabar el conceyu calteníu cola conseyera de Cultura y Turismu del Principáu d'Asturies, Mercedes Álvarez González.

La federación d'enseñanza de CC.OO y el sindicatu SUATEA convoquen una concentración na que col lema "Nun queremos ser invisibles. La llingua asturiana como les demás" va pídise la "creación de la especialidá de llingua asturiana nos cuerpos docentes". La protesta va ser esti miércoles 13 de mayu a les 18:30 hores frente al Palaciu de la Presidencia de Gobiernu d'Asturies n'Uviéu.

TeleCable decidió aumentar la velocidá de conexón d'Internet "en tola so gama de servicios de baldre, asitiando la conexón superior a Internet nos 30 megabits per segundu, un 50 por cientu perriba de lo qu'ufre anguaño esti tipu de serviciu, de 20 megues", según afita la empresa asturiana, añadiendo que "tolos sos clientes verán aumentáu'l so anchu de banda ensin xuba de tarifes".

El director de l'Axencia Asturiana de Cooperación al Desarrollu, Rafael Palacios, presentó en rueda prensa, xunto al conceyal de cultura del conceyu de L.lena, David Suárez, la programación de la segunda edición de 'Asturies Documental Social 2009', que se va celebrar del 13 al 23 de mayu en La Pola, col apoyu de l'Axencia Asturiana de Cooperación al Desarrollu.

Ensin retrasu sobre l'horariu previstu, la misión de la Nasa STS-125 Atlantis, despegó de Cabu Kennedy con destín al telescopiu espacial Hubble. Ye la cuarta y última vegada que se va remocicar l'observatoriu robóticu y el vuelu, arrodiáu d'espectación, tien una complexidá que lu faen un fechu hestóricu pa la astronáutica.
 

El Conseyu Nacional de Bloque por Asturies, celebráu esti fin de selmana en Xixón, reelixó a Roberto Colunga como secretariu xeneral. Col lema "Xuntes, xuntos ¡somos!" los militantes de BA aprobaron una serie de ponencies polítiques sobre mocedá y inmigración, sociedá laica, medios de comunicación, crisis, política cultural, música tradicional, deportes y política municipal. Asimesmo ratificó les aliances afitaes anguaño con IU y los Verdes.