Los sindicatos ANPE, CSIF, FE-CC.OO, SAE, Satse, Sicepa, Simpa, STAJ, Suatea, Usipa y CSI convocaron esti llunes 25 de mayu una movilización pa esixir al Gobiernu asturianu la convocatoria darréu de constitución de la mesa sectorial nos ámbitos de la so competencia como son la sanidá, la xusticia, l'alministración pública y educación.

El pasaú 3 d'abril la Conseyería de Mediu Ambiente dio'l preste al parque eólicu de Carondio y Murellos (Ayande) nuna zona catalogada como "d'altu valor arqueolóxicu", una orde publicada pol BOPA con data de 30 d'abril. La Comision d'Urbanismu y Ordenacion del Territoriu del Principáu (CUOTA) aprobó, con un Plan Especial, esti proyectu, el d'un parque que dende'l 2001 nun salía p'alantre por tratase d'una zona con bayura de túmulos neolíticos.

Los Conceyos de Mieres, L.lena, Avilés y Cangas del Narcea, van repartir ente los comercios d'estos conceyos bolses de papel recicláu nes que se llee la conseña: "¿Tú qué faes pa cuidar el mundu? Reduz, reutiliza, recicla". Trátase d'una iniciativa que busca la concienciación col cuidáu ambiental, al traviés de la sustitución de les bolses de plásticu poles que se tán distribuyendo.

El Sporting algamó trés puntos en Valladolid que pueden suponer la permanencia en Primera. Un partíu nel que los asturianos, a falta de bon xuegu, echaron ganes conscientes de lo que se taben xugando. La eficacia, xunida a dalgo de suerte y a un arbitraxe que por una vez benefició al Sporting, y sobre too les intervenciones del porteru Cuéllar dieron el trunfu a los xixoneses.

El Real Uviéu ganó pola mínima énte'l Mallorca B gracies a un polémicu penalti. Mientres que dos de los representantes asturianos empataron les sos eliminatories, l'Universidá frente al Portugalete (2-2) y el Llanes contra l'Alicante B (0-0). El Candás, que xugaba fuera, perdió 3-2 contra'l Tropezón. Por tanto les cuatro eliminatories tan entá abiertes. Pela so parte'l Sporting B va mantenese un añu mas na 2ªB tres ganar a Las Palmas B.

Yá ye tiempu de qu'entame la temporada de conciertos folk al aire llibre, que tuvieron el so pistoletazu de salida cola Folixa na Primavera de Mieres, y que'l próximu fin de selmana tien la so continuación cola Nueche Folk de Soto Rei que cumple en 2009 seyes años de vida.
 

UNA, Andecha Astur y Fai conmemoren esti 25 de mayu con una serie d'actos que quieren facer alcordanza de los 201 años d'aquel día de 1808 nel que la Xunta Xeneral del Principáu, máximu órganu d'autogobiernu del país, proclamóse soberana rebelándose contra les tropes napoleóniques invasores, organizando un exércitu asturianu baxo la divisa "Asturias nunca vencida" y unviando embaxadores al Reinu Uníu pa solicitar l'ayuda británica frente a los franceses.

El presidente de la Unión de Consumidores d'Asturies (UCE-Asturies), Dacio Alonso, acusó güei a los concesionarios asturianos d'aplicar a los sos coches en venta subíes de preciu nuna cuantía que coincide coles ayudes anunciaes pol Gobiernu estatal a la compra d'automóviles, ye dicir, ente 1.000 y 2.000 euros. La organización anunció tamién una "cruzada (llegal) contra los bancos", polos "abusos" qu'éstos cometen na aplicación d'intereses a hipoteques, demores y gastos con tarxeta de creitu.

Unidá Nacionalista Asturiana, Andecha Astur y IU-Bloque por Asturies entamaron les sos respectives campañes electorales esti vienres cola presentación y pegada de los sos cartelos electorales. Mientres la UNA apuesta pol lema "Da-y voz a Asturies", Andecha Astur emplega "Y tu, vas quedar paráu...?".

El Tribunal Constitucional estimó'l recursu d'amparu presentáu por Iniciativa Internacionalista-Solidaridá ente los Pueblos (II-SP) contra l'anulación, per parte del Tribunal Supremu, de la so candidatura pa les elecciones al Parlamentu Européu del próximu 7 de xunu. Considera asina qu'esta llista, encabezada pol dramaturgu Alfonso Sastre, pue presentase a les elecciones.