La Xunta Electoral proclama las candidatures pa les elecciones europees

La Xunta Electoral Central ta acabante de proclamar les candidatures que van concurrir a les elecciones europees del próximu 7 de xunu. Del total de 37 llistes que van presentase a estos comicios, trés tan conformaes por partíos asturianos. Unidá Nacionalista Asturiana, Andecha Astur y el Bloque por Asturies, esti últimu en coalición con Izquierda Unida, tienen yá'l preste oficial y formen les candidatures asturianes nestes elecciones.

Unidá Nacionalista Asturiana y Andecha Astur preséntense en solitariu, mientres que'l Bloque por Asturies failo dientro d'una coalición con Izquierda Unida. La UNA presenta al so militante xixonés Daniel Fernández Blanco de númberu ún, siguíu por Yolanda González Huergo, y Fernando Ornosa, ex voceru del Conceyu Abiertu pola Oficialidá, nel númberu trés. Pela so parte la candidatura d'Andecha Astur ta encabezada por Mario Arbesú, que yá fuere candidatu a l'alcaldía de Noreña por esta organización. Nel númberu dos figura Arturu Xosé Bermeyu, y nel númberu trés Paloma García Fernández.

El que sí dirá en coalición ye'l Bloque por Asturies, que ta incluyíu na llista de la que formen parte tamién Izquierda Xunida, Iniciativa Per Catalunya-Verds, Esquerra Unida i Alternativa. Pablo Fernández, actual voceru de la organización, ta dientro de la candidatura presentada por esta alianza de partíos d'izquierdes.

Per otra parte, en rellación al restu de partíos, figuren les principales formaciones con representación parlamentaria, como'l PSOE, el PP, la mencionada coalición d'IU con Iniciativa per Catalunya, que van presentase col nome de "La Izquierda", y Unión Progreso y Democracia (UPyD) que s'estrena nunes europees.
 
Les principales formaciones nacionalistes preséntense en dos coaliciones distintes: "Coalición por Europa", qu'agrupa a CiU, PNV y Coalición Canaria, y "Europa de los Pueblos-Verdes", de la que formen parte ERC, BNG, Aralar, Eusko Alkartasuna y la Chunta Aragonesista, ente otros.

Sicasí, dos candidatures fueron refugaes por nun cumplir los requisitos desixíos pa poder presentase: la formación Ciudadanos Agobiados y Cabreados y el Partido Integral, por cuenta de nun rexistrar los avales necesarios que pidi la Llei Electoral (al menos 15.000 firmes d'electores o l'aval de 50 cargos públicos).

Nesti enllaz del Boletín Oficial del Estáu pueden consultase la totalidá de les candidatures proclamaes (en formatu pdf).