Francia da'l preste a la "Llei antipiratería"

L'Asamblea de la República francesa dio ayer el preste a la controvertida llei "Internet y creación", conocida tamién como "Llei antipiratería". Esta llei tien como oxetivu "lluchar conrtra les descargues illegales" y conseña la posibilidá de desconexón a la rede durante un periodu de trés meses a un añu a los usuarios que descarguen illegalmente conteníos suxetos a derechos d'autor. 

Por 296 votos contra 233 l'Asamblea Nacional francesa aprobó esta nueva llei. Sicasí, nun hubo unanimidá nin na formación que la promovía,la derechista y gobernante UMP como na oposición d'izquierdes, anque fueron mayoritarios los que sofitaron esta llei nel primer casu y los que la refugaron nel segundu. Hai un mes la oposición d'izquierdes fue quién a baltar la mesma proposición de llei. Agora queda que'l Senáu la ratifique, anque los socialistes yá anunciaron que van recurrir la llei énte'l Conseyu Consitucional.

Sanciones de trés a doce meses ensin conexón a Internet depués de trés avisos
 
Esta llei nueva afita la desconexón de la rede durante un periodu que puede dir de los trés meses a un añu. Sicasí, l'encargáu de sancionar a los infractores nun van ser los tribunales ordinarios, sinón una "Haute autorité pour la diffusion des œuvres et la protection des droits sur Internet" ("HADOPI" o "Alta Autoridá pa la Difusión d'Obres y la Protección de Derechos sobre Internet"), que tien como oxetivu adoptar una respuesta "gradual" a los internautes que faigan descargues "illegales".

El procesu sancionar ye'l que vien darréu: detectada una infracción y localizáu l'usuariu al traviés de la so IP, en primer llugar va unvíase-y un corréu electrónicu d'alvertencia; si reincide habrá segundu corréu acompañáu d'una carta certificada y, nel casu d'una tercer reincidencia, una comisión podrá ordenar que se-y corte l'accesu a internet durante un periodu d'ente trés y doce meses ensin que por ello l'usuariu dexe de pagar el serviciu.

Sicasí esta llei ta pendiente amás de confrontase cola doctrina de la Unión Europea por cuenta que'l Parlamentu Européu aprebó la selmana pasada una enmienda según la cual la suspensión d'Internet ye competencia de los xueces y non d'un organismu alministrativu como ye HADOPI.