El ciclista del equipu norteamericanu Rock Racing, Oscar Sevilla, ganó la segunda etapa de la Vuelta Asturies, que trescurrió ente Llanes y Xixón. Nesta xornada hubo amás cambiu nel lideratu, pasando del neozelandés Chadwick al portugués Machado.

La Mesa de la Cámara almitió a trámite la declaración en comisión de Mediu Ambiente, Ordenación del Territoriu y Infraestructures del presidente de l'Autoridá Portuaria de Xixón, Fernando Menéndez Rexach, pa qu'esplique tolo rellacionao cola posición de la Unión Europa sobre la financiación del aumentu de coste de les obres del puertu d'El Musel.

La tercer edición de la Muestra cultural "Tolo d'Asturies", organizada pola Agrupación Etnográfica "Reija", va celebráse ente los díes 14 y 17 de mayu nel conceyu de Llangréu. Esti eventu quier ser una amuesa d'actividaes qu'espeyen la cultura del país, especialmente no que cinca a la música asturiana. D'esti mou van entamase una serie d'actividaes ente les que rescamplen los conciertos.

El grupu municipal d'Izquierda Unida-Bloque por Asturies del conceyu de Samartín del Rei Aurelio ta acabante de presentar una moción pa que'l Plenu apruebe "el cambiu de les señalizaciones y rótulos informativos de los servicios y equipamientos municipales, camudando los esistentes anguaño por otros que recueyan la información tanto en castellanu como n’asturianu".

El ciclista neozelandés Glenn Chadwick, del equipu norteamericanu Rock Racing, ye'l primer lider de la 53 edición de la Vuelta Ciclista a Asturies tres ganar la primer etapa, ente Uviéu y Llanes, depués de 156 kilómetros de recorríu con un tiempu de 3 hores, 23 minutos y 36 segundos. L'asturianu Samuel Sánchez, medallista olímpicu, quedó sestu na etapa a 3 minutos y 3 segundos.

La conseyera de Cultura, Mercedes Álvarez, y la directora xeneral de Política Llingüística, Consuelo Vega, dieron anuncia del programa d'actos oficiales previstos pa la trixésima edición d'esti eventu cultural. La escritora Enriqueta González Rubín (Santianes el Agua -Ribeseya-, 1832 - L'Infiestu, 1877), va ser la homenaxada esti añu na Selmana de Les Lletres Asturianes, que se va celebrar ente'l 4 y el 8 de mayu.

La presidenta de la Xunta de Personal Docente y máxima responsable de Suatea, Beatriz Quirós, anunció que los sindicatos van recurrir ante los tribunales los nuevos baremos de valoración de méritos pa les oposiciones d'educación primaria porque "cambiaron radicalmente". Como exemplu, esplicó que los cursos de llingua asturiana yá nun vienen espeyaos nellos.

La ministra de Sanidá y Política Social, Trinidad Jiménez, confirmó que dio positivu como afeutáu de gripe porcina'l mozu de 23 años aisláu nel Hospital Xeneral d'Almansa (Albacete), como sospechosu de carecer una casu de la epidemia, tres tornar de México'l pasáu día 22 d'un viaxe d'estudios. N'Asturies, la Conseyería de Salú detectó un posible casu.

Alredor de 11.000 docentes de les enseñances non universitaries tan convocaos polos sindicatos SUATEA, CC.OO, CSIF y ANPE esti martes 28 d'abril a una nueva xornada de fuelga pola negativa de la Conseyería a reunir la mesa sectorial d'educación y a retirar el plan d'evaluación de docentes. Esti ye'l segundu paru convocáu tres la fuelga del pasáu 2 d'abril.

Los Sestos Alcuentros de la Mocedá cola Llingua, "Saca la Llingua" van facese esti martes 28 d'abril nel Muséu del Pueblu d'Asturies, ente les 10:00 y les 14.00 hores. Cerca de 550 mozos y moces de los Institutos de Xixón "van participar nuna xornada lúdico-pedagóxica na que s'intenta averar la llingua asturiana a la mocedá de manera prestosa" según la Oficina Municipal de la Llingua, qu'organiza, "con gran éxitu, esta actividá dende hai seis años".