CC.OO y SUATEA convoquen una concentración pola creación de la especialidá d'asturianu

La federación d'enseñanza de CC.OO y el sindicatu SUATEA convoquen una concentración na que col lema "Nun queremos ser invisibles. La llingua asturiana como les demás" va pídise la "creación de la especialidá de llingua asturiana nos cuerpos docentes". La protesta va ser esti miércoles 13 de mayu a les 18:30 hores frente al Palaciu de la Presidencia de Gobiernu d'Asturies n'Uviéu.

A primeros d'esti añu dábase conocencia pública d'una sentencia del Tribunal Supremu que declaraba “contraria a derechu” la existencia de les “plantiyes funcionales”, categoría na que la Conseyería d’Educación englobaba a los docentes d’asturianu y gallego-asturiano. Ente esta situación que dexaba nel aire la situación xurídica de los profesores d'asturianu contituyóse una Plataforma de Docentes d’Asturianu que vien llueu conseñó los pasos a siguir énte esti problema: la “creación y inclusión de les especialidaes de Llingua Asturiana y de Gallegu-asturianu nel Catálogu de puestos de trabayu”;  la “dotación de places de llingua asturiana nes plantiyes orgániques de tolos centros”;  “convocatoria d’oposiciones”, y como últimu pasu nel procesu un “concursu de tresllaos”.

Los sindicatos CC.OO. y SUATEA súmense a la reivindicación de la creación de la especialidá convocando esta concetración. Una petición que SUATEA afitó en xineru pasáu al traviés d'un comunicáu nel que recordaba que’l "Conseyu Escolar del Estáu aprobó la creación de les especialidaes d’asturianu y gallego-asturiano" y que “la Conseyería d’Educación tien que facer efeutiva la sentencia del tribunal supremu que ganó SUATEA na que se declara contraria a derechu la esistencia de les plantiyes funcionales n’educación, considerando illegal la regulación de la figura de sobrantes d’horariu y de les especialidaes afines”.