Va celebrase una xuntanza de cultura tradicional gallega y asturiana nel conceyu de Santu Adrianu'l próximu fin de selmana del 6 de mayu. L'Alcuentru de Pandereta Gallega ya Asturiana, que va llegar a la so séptima edición, va ser la escusa pa que la música asturiana y gallega topen puntos d'alcuentru, faciendo que la folixa lo mezqule too.

El folk asturianu va tocar nuna de les partes más al norte d'Escocia, les islles Shetland, onde se celebra un festival de folk de gran prestixu n'Europa, el Shetland Folk Festival, y onde Felpeyu va llevar los cantares de del últimun discu.
 

La editorial Araz Llibros va asoleyar, coincidiendo cola Selmana de les Lletres Asturianes, un nuevu llibru tituláu “Mal de llingües. Alredor de los prexuicios llingüísticos” de Jesús Tuson Valls, caderalgu de llingüística de la Universitat de Barcelona, nuna traducción d’Héctor Gil. Esta obra, rigurosa y amena, ye una defensa de la diversidá llingüística de la humanidá y algamó les 29 ediciones en catalán.

El cuentu 'Ella y Ariel', del candasín David Artime Coto, foi'l ganador de la segunda edicición del concursu lliterariu Arbidel de cuentos eróticos n'asturianu, organizáu pol Conceyu de Ribeseya dientro del marco de les actividaes de la Selmana de les Lletres Asturianes. Pela so parte, l'escritor xixonés y collaborador d'Asturies.com, Pablo Rodríguez Alonso, algamó l'áccesit col relatu 'El confesor'.

Esti vienres el CSOA LA Reflexón de Xixón va acoyer a partir de les 18 hores la sétima edición de la Folixa del Primeru de Mayu, entamada pol FUSOA. Nesti "festival solidariu" van actuar los grupos, per esti orden, "Arrabuñazo", "Skontra", "Dakirradia" y va pesllalu a les 22:30 hores "Habeas Corpus". Les entraes van vendese na taquilla durante tol día a un preciu de 10 euros.
 

La Vuelta Ciclista a Asturies disputó ayeri la so tercer etapa xebrada en dos sectores. Nel primer sector, ente Xixón y Avilés, impúsose al sprint l'eslovenu Grega Bole (Amica Chips). Mientres na contrarreló de la tarde diba ser Héctor Guerra (Liberty) el qu'algamare'l trunfu. L'asturianu Samuel Sánchez (Euskaltel) quedó segundu y el líder, Tiago Machado (MAdeinox-Boavista) conservó'l maillot amariellu al llegar sólo a 12 segundos.

La Viceconseyera de Mediu Ambiente, Belén Fernández González, aconceyóse en L'Infiestu colos alcaldes de Colunga, Parres, Caravia y Piloña, p'avanzar na declaración del Paisaxe Protexíu del Sueve. Trátase del segundu alcuentru ente los responsables de l'Alministración autonómica y los conceyos afeutaos, a la que tamién se sumaron los representantes de la Xunta d'alministración de la Comunidá de Ganaderos del Sueve.

El Conseyu de Gobiernu del Principáu d'Asturies autorizó, nel so conceyu d'ayeri, una partida de 800.500 euros pa financiar la convocatoria pública pa la concesión de sovenciones pa la normalización social del asturianu, y nel so ámbitu gallegu-asturianu, según informó nuna rueda de prensa n'Uviéu la conseyera d'Alministraciones Públiques y Vocera del Gobiernu, Ana Rosa Migoya.

La Oficina Municipal de la Llingua del Conceyu de Xixón presentó nos sestos Alcuentros de Mocedá "Saca la Llingua", un 'karaoke' de temes conocíos de la música asturiana más popular de diferentes estilos, col fin de promocionar la llingua asturiana ente esi sector de la sociedá.

El 65,70 por cientu de los ciudadanos vascos castellanofalantes tentaron de deprender euskera en dalguna ocasión y el 55 por cientu se sienten "averaos al mundu del euskera", mientres que menos del 10% asegura que nun-y interesa, según recueye l'estudiu 'Tópicos, prexuicios y actitudes de la población castellanofalante ante l'euskera', realizáu por Unesco Etxea pa la Viceconseyería de Política Llingüística del Gobiernu vascu.