Cine documental, alderiques, música y teatru na nueva edición del 'Asturies Documental Social', que se celebra en L.lena

|

El director de l'Axencia Asturiana de Cooperación al Desarrollu, Rafael Palacios, presentó en rueda prensa, xunto al conceyal de cultura del conceyu de L.lena, David Suárez, la programación de la segunda edición de 'Asturies Documental Social 2009', que se va celebrar del 13 al 23 de mayu en La Pola, col apoyu de l'Axencia Asturiana de Cooperación al Desarrollu.

   Les actividaes programaes inclúin un cliclu de cine documental nel Teatru Vital Aza, nel que van proyeutase obres de diferentes países d'América Llatina, como Brasil, Cuba, Uruguai, México o Chile, como ye'l casu del documental 'Calle Santa Fé', de la directora Carmen Castillo.

   Tamién se programaron charres, video-Forums, con especial atención al mundu musulmán, Palestina o'l llabor de Mélicos del Mundu en Sierra Lleona, obres de teatru, música social en llingua asturiana, esposiciones y talleres escolares que se van desarrollar nos centros de primaria y Secundaria de la Comarca del Caudal.

   El sábadu 16, ente les 12.00 y les 19.00 hores, van tener llugar un Mercáu Solidariu na Plaza Alfonso X el Sabio.

   L'oxetivu d'ADocS ye crear un espaciu nel que se puea analizar el valor positivu de la diferencia. Les actividaes programaes busquen sensibilizar a la población asturiana pa crear un mundu más xustu. Nesta segunda edición, ADocS cuenta con una programación muncho más ambiciosa cola que pretende tornar nun referente pa toa Asturies.
 

Contador Estadistiques