TeleCable xube la velocidá de la so conexón a Internet hasta 30 megues

TeleCable decidió aumentar la velocidá de conexón d'Internet "en tola so gama de servicios de baldre, asitiando la conexón superior a Internet nos 30 megabits per segundu, un 50 por cientu perriba de lo qu'ufre anguaño esti tipu de serviciu, de 20 megues", según afita la empresa asturiana, añadiendo que "tolos sos clientes verán aumentáu'l so anchu de banda ensin xuba de tarifes".

L'aumentu de velocidá va aplicase en tolos niveles d'accesu. Asina, el serviciu "Internet Avanzáu" duplica so velocidá, que pasará de 10 a 20 megues y el "Básicu" llegará hasta los 10 megues, dende los 4 actuales. Igualmente, pónse a furrular un serviciu dirixíu al mercáu empresarial, denomináu ‘Premium’, que contará con 35 megues de  velocidá de descarga y de 1,5 megues de xuba.

Según informa TeleCable "les velocidaes ampliaránse en tolos servicios de conexón a Internet de baldre y ensin que los clientes tengan que realizar actuación alguna, yá que la empresa va facelo de forma remota y automática". Los cambios van facese de forma progresiva de magar esta selmana p'aquelles cases y empreses que cuenten con esti tipu de servicios. El plazu previstu por TeleCable pa que la casi totalidá de conexones dispongan de les nueves velocidaes ye de dos selmanes.