El Grupu Parlamentariu Popular presentó güei na Xunta Xeneral del Principáu d'Asturies una proposición non de llei p'afalar al Gobiernu autonómicu a crear la especialidá de bable/asturianu pal profesoráu de Llingua Asturiana y Gallego-Asturianu d'Infantil, Primaria y Secundaria. Los populares quieren, con esta midida, que los profesores d'esta materia cuenten con "idéntiques garantíes llaborales y profesionales que'l restu".

Los sindicatos ANPE, CSIF, FE-CC.OO, SAE, Satse, Sicepa, Simpa, STAJ, Suatea, Usipa y CSI convocaron pal próximu día 25 una movilización pa esixir al Gobiernu asturianu la convocatoria darréu de constitución de la mesa sectorial nos ámbitos de la so competencia como son la sanidá, la xusticia, l'alministración pública y educación.

El candidatu d'Unidá Nacionalista Asturiana a les elecciones europees Daniel Fernández, presentó n'Uviéu los oxetivos principales d'UNA nestos comicios así como'l lema col que va concurrir: "Da-y voz a Asturies". Según Fernández el primer oxetivu ye “ufrir a tolos asturianos la posibilidá de votar a una fuerza que dea voz a les reivindicaciones d'Asturies".

Esti próximu sábadu 23 de mayu la organización nacionalista Andecha Astur va celebrar otra vuelta'l "Día d'Andecha", que nesti añu llega a la so XII edición. El llugar escoyíu va ser Ribeseya y van entamase una serie d'actividaes como un "Descensu vindicativu del ríu Seya", partida de bolos y taller de cuatreada, pasucais de gaiteros, espicha con música del país, amás d'un mitín y un conciertu.

Rematada yá la temporada regular na Tercera División del fútbol asturianu, cuatro son los equipos del país que opten al ascensu a Segunda División B y que yá conocen a los sos rivales: el Real Uviéu, el Candás, el Llanes y el Universidá d'Uviéu. Una categoría de la que baxó'l Marino de Lluanco y na que'l Sporting B ta xugándose la permanencia frente a Las Palmas B.

ArcelorMittal anunció a los sindicatos y a la direición de les empreses auxiliares qu'enantes de qu'acabe'l mes de mayu van presentar un plan de reordenación del sector auxiliar. La multinacional afirmó qu'una vez se presente va tratase de llegar a a un acuerdu sobre'l mesmu ente toles partes, pero los sindicatos sospechen qu'el mesmu significa más perdes d'emplegos que, aseguren, "nun tán dispuestos a tolerar".

Prexubilaos de Naval Xixón y axentes policiales s'enfrentaron güei en Xixón, cuando los enzarraos se disponíen a entamar de nuevo les movilizaciones. Según confirmaron fontes sindicales, la policía entamó a tirar botes de fumu y pelotes de goma nel momentu nel que se disponíen a salir a cortar el tráficu. Nestos momentos, un fuerte cordón policial arrodia les instalaciones del astilleru nes que siguen enzarraos los trabayadores.

El candidatu d’UNA a les europees Daniel Fernández afirma que la propuesta Zapatero de da-y un ordenador al alumnáu pue ser un brindis al sol sinon cuenta cola implicación del profesoráu ya  infraestructures afayadices.Asimesmo pidió-y al Conseyeru d’Educación d’Asturies, José Luis Iglesias Riopedre, qu’esplique “cómo se va a xestionar la midida de Zapatero d’apurri-y un portátil a cada alumno de quintu de primaria n’Asturies” desque la so Conseyería tien competencies na materia.

Había que ganar y l'equipu asturianu ganó. Trés puntos que suponen salir del descensu y afrontar les dos últimes xornaes con ciertes garantíes de permanencia y enforma sabiendo que depende de si mesmo. Un trunfu nun Molinón enllenu nel que'l públicu foi'l xugador númberu doce del Sporting. Una ciudá, Xixón, y un país, Asturies, que merecen seguir en primera.

Zaragoza acueye esti sabadu una manifestación pola igualdá llegal y alministrativa de les tres llingües que se falen n'Aragón: el castellán, el catalán y la 'fabla' o aragonés, de cara a la futura aprobación de la Llei de Llingües na que trabaya el parlamentu d'esta comunidá autónoma.
 
La marcha ta convocada pola Coordinadora Aragón Trilingüe y va salir a les 12.00 hores de la Glorieta Sasera.