L'Academia de la Llingua Asturiana abre dende esti 25 de mayu hasta'l 6 de xunu'l plazu p'apuntase a la edición 2009 de los sos cursos de branu. Los cursos van ser en Santantolín (Ibias) en réxime d'internáu del 3 al 14 d'agostu de 2009. Esta edición compónenla los Cursos Elemental y Avanzáu de Llingua Asturiana, dambos en collaboración cola Universidá d'Uviéu, asina como los d'Afondamientu Cultural y Llingüísticu y el Curso de Gallego-Asturiano (Primeira Fase).

El xulgáu d'instrucción númberu 3 de Xixón decidió declarar el sobreseimientu provisional de la denuncia presentada por Andecha Astur contra la Zona d'Actividaes Lloxístiques y Industriales d'Asturies (Zalia) con motivu del desaniciu d'horros en San Andrés de los Tacones (Xixón). "De lo actuao nun apaez debidamente xustificada la realización del delitu", establez el sobreseimientu. La resolución señala la posibilidá d'interponer recursu n'apellación nel plazu de cinco díes siguientes a la so notificación.
 

El Sindicatu Unitariu Autónomu de Trabayadores de la Enseñanza d'Asturies (Suatea) valoró enforma la iniciativa del PP na Xunta Xeneral a favor de la creación de la especialidá de Llingua Asturiana nel sistema educativu. Recordó, de la mesma manera, que los otros grupos representaos na cámara, IU y PSOE, caltuvieron "nun momentu o otru, postures asemeayes a ésta, y afalólos a votar a favor de la iniciativa".

El Ministeriu de Mediu Ambiente y Mediu Rural evaluó favorablemente'l proyeutu de Variante de la llinia eléctrica a 400 KV Sotu Ribera-Penagos, nel conceyu de Piloña (Asturies), siempre y cuando s'autorice na alternativa elixida y nes condiciones señalaes na Declaración d'Impautu Ambiental (DIA), deducíes del procesu d'evaluación.

El Gobiernu del Principáu d'Asturies y el Conseyu de Comunidaes Asturianes van presentar esti fin de selmana nos centros asturianos de Lausanne y Berna (Suiza) el llibru 'Por partida doble', una recopilación de dellos poemes de diez escritores n'asturianu. La presentación del volume, nel que les obres se muestren n'asturianu y en castellán, s'enmarca na celebración del Día de Les Lletres Asturianes nel Esterior.

La Universidá d'Uviéu anuncia que va regular nel nuevu reglamentu l'usu del asturianu. D'esti mou, van podese presentar escritos n'asturianu al traviés del rexistru de la institución. Sicasí, la respuesta per parte de la Universidá va ser siempre en castellán. Asimesmo, anque va aceptase de forma parcial nel usu alministrativu, non va ser asina pal usu académicu, que va siguir vetáu pa la llingua del país.

La Xunta pola Defensa de la Llingua Asturiana valora "mui positivamente" la iniciativa del Partido Popular de presentación d’una proposición non de llei pa la incorporación de la especialidá de Llingua Asturiana nel sistema educativu. Esta iniciativa foi presentada ayer y pretende que profesores d'asturianu cuenten con "idéntiques garantíes llaborales y profesionales que'l restu".

La presidenta del Colexu de Mélicos d'Asturies, Carmen Rodríguez, considera "inviable" que los hospitales de la rede pública asturiana ofreza la prestación de la interrupción voluntaria del embarazu, dao que "tolos mélicos oxeten" a dicha práutica. Asina, en rellación col anteproyeutu de Llei de Salú Sexual y Reproductiva, y de la Interrupción Voluntaria del Embarazu, Carmen Rodríguez destacó que "tolos mélicos del serviciu de Salú del Principáu s'acoyeron a la oxeción de conciencia", y apuntó que nesti momentu nos hospitales públicos "nun se prautiquen albuertos".

El gobiernu l.lenizu acaba de convocar les subvenciones de Deportes, Cultura, Mocedá, AMPAs, Bientar Social, Muyer y pa esparder la Cultura Asturiana nes Fiestes. La novedá ye qu'ente les obligaciones de les asociaciones y colectivos que quieran optar a estes ta la de "facer la publicidá en billingüe (asturianu – castellanu) o sólo n’asturianu".

La organización Fai! entama esti 23 de mayu nel CSOA La ReFLEXón de Xixón una "xornada reivindicativa y folixera que va cuntar con un recital poéticu, la ellaboración d'un mural conmemorativu y un conciertu. D'esti mou esta "organización soberanista" quier recuperar esta data como "día nacional d'Asturies" baxó'l nome de primer "Folixa Nacional Asturies enxamás vencida”.