Día del Llibru Asturianu

El PSOE diz que la Sindicatura de Cuentes "nun actúa con rigor y independencia"

|

El diputáu del grupu parlamentariu socialista, Álvaro Álvarez, mostróse críticu cola actuación de la Sindicatura de Cuentes y aseguró que la mesma "tien munchu trabayu por facer", porque al so xuiciu "nun ta actuando con rigor, nin dando sensación d'independencia". "Dende'l PSOE queremos una Sindicatura independiente, que cumpla la llei, que se gane'l prestixu ante los asturianos y la cámara, y que tea exenta de presiones p'actuar con independencia", dixo Álvaro Álvarez.

   El diputáu socialista se manifestaba asina demientres el so turnu d'intervención na Comisión d'Economía y Facienda na que s'aldericaba l'informe definitivu de la Sindicatura de Cuentes sobre la fiscalización de Sedes SA, nel exerciciu 2006 y les propuestes de resolución presentaes al mesmu.

   "La independencia nun ye sólo del Gobiernu, sinón tamién d'otros grupos y hai que ganásela", dixo Álvarez, qu'añadió que "la Sindicatura nun se ganó'l respetu de la Cámara, nin de los ciudadanos, a xuiciu del espectáculu de los últimos meses".

   En cuanto al informe definitivu de Sedes, Álvaro Álvarez aseguró que'l so grupu parlamentariu nun pue asumir les conclusiones del mesmu, nin el so desarrollu porque "carez de rigor y precisión y fai apreciaciones inxustificaes y infundaes sobre acontecimientos y fechos que nengún síndicu medianamente responsable facía".

   "L'auditor partió d'un xuiciu preestablecíu previamente sin valorar fechos, actos y acuerdos", dixo'l diputáu del PSOE, qu'insistió en que dichu informe ta llenu de "imprecisiones y xuicios de valor, con afirmaciones inxustificaes, nun respuenden a criterios d'oxetividá".

   Y ye que pal grupu parlamentariu socialista nun hai porque asumir siempre certeza a la Sindicatura, nin tampoco hai qu'establecer que cualquier declarante xerente d'una sociedá fiscalizada ta condenáu a nun ser creyíu, porque la so información seya contraria a la de la Sindicatura.

   Poro, indicó qu'hai aspeutos de la intervención del xerente de Sedes que me merecen el mesmu creitu que la Sindicatura. Sicasí, insistió en que'l so grupu fai suyes "íntegramente" les recomendaciones qu'establez l'informe.

Contador Estadistiques