El Rector de la Universidá d’Uviéu y la Presidenta de l’Academia de la Llingua piesllen oficialmente los XXVII Cursos de Branu. L’actu va ser esti vienres 18 de setiembre, a les 18:00 hores, nel Paraninfu de la Universidá d’Uviéu (c/ San Francisco).
 

El Conseyu de Gobiernu del Principáu aprobó los decretos de proteición del entornu de nueve cueves asturianes con arte rupestre paleolíticu, ente les que figuren les de Tito Bustillo (Ribesella) y Llonín (Peñamellera Alta), incluyíes dende'l pasáu añu nel llistáu de Patrimoniu Mundial de la Unesco.

La Coordinadora Ecoloxista d’Asturies ta acabante de presentar alegaciones énte l'alministración asturiana pa que na prevista ampliación de la Estación Invernal de "Fuentes de Invierno" n'Ayer se faiga enantes un "estudiu d'impactu ambiental seriu". Según los ecoloxistes lo que "s'aprobó en xunu de 2004, taba venceyao a que les obras se fixeren enantes de 5 años. Al pasar estos 5 años ye preciso una nueva tramitación pa cualesquier ampliación, como les previstes agora".

L'asociación cultural Trebolgu d'Uviéu nun tien pensao organizar nueves ediciones de los Alcuentros Tradicionales, qu'el pasáu llunes celebraron la so décima edición, incluyíos la primer vez nel programa de conciertos de la Plaza de la Catedral de San Mateo. La esperanza del colectivu ye que seya l'Ayuntamientu'l que siga organizándolos, oxetivu col qu'ofrecen la so total collaboración.

L'Asociación Cultural de Los Vaqueiros d'Alzada La Brañina constituyó los premios al 'Vaqueiru Exemplar' y la 'Braña Exemplar', qu'entregará n'ochobre del 2010 coincidendo col décimu aniversariu de l'asociación y con carácter añal.

La Conseyería de Mediu Ambiente investiga la muerte de pexes asocedida na ría d'Avilés esta selmana. Depués de conseñar la presencia de pexes muertos na ría, la Guardería de Calidá del Agua de la Conseyería recoyió los restos p'analizalos así como amueses del agua, col oxetivu d'averiguar si hai dalguna causa qu'afite y clarifique la causa de la muerte de los pexes. El Colectivu Ecoloxista yá denunciare'l llunes al Principáu'l vertíu d'una sustancia oleaxinosa na ría.

Esti 16 de setiembre les activiadaes de l'Arribada continúen en Xixón. Concretamente a les 18 hores nel patiu del Centru de Cultura Antiguu Institutu va ser la inauguración de la esposición "Buelga Astur" coles obres finalistes del II Concursu de Fotografíes de Tierra Astur. Cada obra fotográfica acompáñase "con unos versos d'un/a poeta asturianu/a, en llingua asturiana o gallego-asturianu, venceyaos a la temática de la semeya".
 

El Tribunal Superior de Xusticia d'Asturies (TSXA) dictó un autu comunicáu nel qu'obliga a la Conseyería d'Educación del Principáu a caltener el conciertu educativu en primeru d'Educación Infantil al colexu Peñamayor. Con esta decisión, yá son los dos colexos d'educación diferenciada d'Asturies los que caltienen el conciertu, dempués de que'l pasáu 22 de xunetu el TSXA dictaminare otru autu concediendo la suspensión preventiva de la Orde de la Conseyería que suprimía'l conciertu al colexu Los Robles en primeru de Primaria.

La Generalitat evitó pronunciase sobre la consulta pola independencia que'l domingu realizó Arenys de Munt (Barcelona) y sobre la voluntá d'una sesentena d'ayuntamientos catalanes de promover otres esta seronda. Sicasí, consideró que les consultes sobre l'autodetermín de Cataluña promovíes por entidaes cíviques tán "dientro de la llegalidá", siempre que nun cuenten col apoyu de los ayuntamientos. Aseguró qu'esti foi'l casu d'Arenys.

El presidente del PP n'Asturies, Ovidio Sánchez, acusó al presidente del Principáu, Vicente Álvarez Areces, de vivir nuna "arcadia feliz" y recordó-y que'l paru subió n'Asturies nel últimu añu un 40 por cientu. "Va haber miles de persones que crean qu'Areces, colos sos comentarios sobre la bona marcha d'Asturies, ta tomándo-yos el pelu". Sánchez realizó estes manifestaciones demientres la rueda prensa qu'ofreció na Xunta Xeneral del Principáu col oxetu d'analizar dellos asuntos de l'actualidá del país.