La Unión Europea tresfirió a l'Autoridá Portuaria de Xixón 198 millones d'euros pa l'ampliación del puertu, lo que supón el 80 por cientu de l'ayuda comunitaria con cargu a los fondos de cochesión. En total, l'aportación de la Unión Europea ye de 247,5 millones d'euros. Con fecha 20 de xunu del 2005, l'Autoridá Portuaria de Xixón recibió'l primeru de los cobros, como anticipu de 49,5 millones d'euros, correspondiente al 20% del total de los fondos.

Unidá Nacionalista Asturiana entama pa esti vienres 11 de setiembre una charra na que se tratará'l desarrollu del nacionalismu d'esquierda n'Asturies y Aragón, baxo'l títulu "Les fuerces polítiques propies n'Aragón y Asturies". La cita ye a les 19.30 hores nel Salón d'Actos de la Biblioteca Pública Xovellanos, asitiada na Cai Xovellanos 23 de Xixón y va contar cola presencia de Gregorio Briz, en representación de Chunta Aragonesista, y Faustino Zapico, voceru nacional d'UNA.

La conseyera d'Alministraciones Públiques y Vocera del Gobiernu, Ana Rosa Migoya, esplicó que la creación d'ordenadores p'alumnos de quintu de primaria, incluyida nel 'Plan Escuela 2.0', va ser "progresiva" y "paulatina". Asina, de les 385 unidaes de quintu de primaria existentes n'Asturies, Migoya dixo que nuna primer convocatoria, esta seronda, van distribuyise en 100, siguiendo criterios como la meyor adautación de necesidaes del centru o la formación del profesoráu.

El presidente de la Unión de Consumidores d'Asturies, Dacio Alonso, apuntó que la organización analiza la posibilidá de presentar una denuncia ante la Fiscalía polo que considera un "chantaxe vergonzosu" de dalgunos colectivos mélicos que declararon que, ante la incidencia del Gripe A, garraríen la baxa con una "décima de fiebre".

La Estaya de la Llingua del Conceyu d'Avilés abre'l plazu de matrícula a partir del llunes día 14 d'esti mes pa inscribise nel Cursu d’Aniciu de Llingua Asturiana p’adultos. La duración del mesmu sedrá de 30 hores, dende’l día 29 de setiembre hasta’l 17 de payares, n’horariu de 19:00 a 21:00 hores, martes y xueves.

El númberu d'oses pardes con esbardos incrementóse nel Cordal Cantábricu un 250% en diez años, concretamente ente 1998 y 2007, al pasar de seis a 21. D'esti total, la mayoría (18) llocalizáronse na población occidental, ente Lugo, y el suroeste d'Asturies, y el noroeste de Lleón, mientres que les trés restantes contabilizáronse ente la población oriental, que s'estiende pela montaña palentina, la oriental lleonesa, l'oriente asturianu y montes cántabros de Campoo de Suso y Liébana.

Asturies foi, xunto con Cantabria, la segunda comunidá autónoma na que menos aumentó'l consumu enerxéticu ente'l 2005 y el 2007, ambes, con una subida del 23,5%, perdelantre sólo del repunte de Galicia, que foi del 22,9%.Pela so parte, les  mayores subíes en dichu periodu rexistráronse en Canaries (52%), Aragón (51,1%) y Andalucía (47%), según la última encuesta oficial de Consumos Enerxéticos.

El presidente de la Fundación José Cardín y director de la Real Academia Española, Víctor García de la Concha, presenta esti 10 de setiembre en Villaviciosa'l llibru 'Hórreos', "un llibru imprescindible pa entender l'arquitectura tradicional asturiana". L'actu de presentación va tener llugar a les 11 hores na sede de la Fundación José Cardín, asitiada na cai Eloísa Fernández 2, en Villaviciosa.

Cuadonga y Cuideiru concentren los actos principales d'esti Día d'Asturies. A les 10:30 hores l'obispu alministrador diocesanu d'Uviéu, Raúl Berzosa, va oficiar la tradicional misa n'honor de la Virxen de Cuadonga a la qu'asistirán dellos representantes del Gobiernu y el parlamentu asturianu, mientres que la capital pixueta acueye la xornada festiva entamada pol Gobiernu asturianu.

Como yá ye tradicional tolos 8 de setiembre, xunto a los actos institucionales, otres fuerces polítiques entamen los sos propios actos de marcáu calter reivindicativu. Esta vegada son cuatro les cites d'esti tipu. N'Illas van aconceyar Izquierda Xunida, Los Verdes, Bloque por Asturies y Lliberación; en Xixón Unidá Nacionalista Asturiana; n'Uviéu Andecha Astur entama una manifestación a la que van asistir el Partíu Carlista, el PCPE y el sindicatu CSI, y en Villaviciosa Unión Asturianista organiza un actu politicu.