El sindicatu educativu SUATEA afita qu'esti 8 setiembre "deberíemos festexar que les nuestres instituciones pasu ente pasu fueron construyendo’l país contribuyendo al so desarrollu socio-económicu y consolidando la so cultura propia; pero en bien poco o más bien en nada se collaboró nello dende l’ámbitu educativu", y pide la oficialidá del asturianu y la creación de la especialidá de llingua asturiana ente'l profesoráu.

Por cuenta de la celebración de los actos institucionales del Día d'Asturies en Cuideiru, el grupu de música asturiana "Tejedor" va ufrir un espectáculu col títulu de “Tejedor 8S Cuideiru” a partir de les 22:00 hores, nel que xunto a los asturianos van participar los músicos irlandeses Karan Kasey y Niall Vallely, l'escocés Duncan Chisholm, los vascos Iñaki Plaza y Ion Garmendia, la banda de gaites "Sonerien An Oriant" de Bretaña y el grupu gallegu "Faltriqueira".

Un conceyu celebráu ente Mariu Arbesú, representante d'Andecha Astur y Lluis Anxel Núñez, del Partíu Asturianista, sirvió pal intercambiu de puntos de vista alrodiu de la situación política y económica del nuesu país y p'abrir una canal de comunicación de cara a futures collaboraciones ente PAS y AA, según informen dambes organizaciones.
 

El Premiu Timón, otorgáu poles xornaes lliteraries de l'Arribada que van celebrar una edición más esti setiembre en Xixón, fue a parar al veteranu escritor Manuel García "Galano", según decidió por unanimidá un xuráu que rescampló el "valir de la so trayectoria lliteraria y la so aportación a la cultura del occidente asturianu".
 

La Tertulia Cultural El Garrapiellu convoca un añu más los Premios de Cuentos Curtios, que fai la so XVIII edición. Dende El Garrapiellu afiten qu'estos premios, yá clásicos nel panorama lliterariu del país, quieren ser "el cumal d’un añu enllenu d’actividaes".
 

El conceyu de Cuideiru acueye los actos oficiales conmemorativos del Día d'Asturies 2009, que se celebren del 5 al 8 de setiembre y qu'esta edición cuenten coles actuaciones de Miguel Ríos, "El Sueño de Morfeo", "Tejedor" y Luz Casal, ente otres munches actividaes. Según el Presidente asturianu, Vicente Álvarez Areces, son "cuatro díes de festeyos intensos y variaos, nos que gociar xuntos de l'arrogancia cola que los asturianos sentimos la convivencia y, al tiempu, reforciar l'enfotu nos nuestros proyeutos de futuru".
 

Les organizaciones y partíos políticos d'ámbitu asturianu celebren una vez más por separao l'ocho de setiembre en cuatro actos diferentes que van tener llugar en cuatro poblaciones asturianes: Illas,Uviéu, Xixón y Villaviciosa.
 

La creación neta d'empreses cayó un 25,69% el pasáu mes d'agostu sobre'l mesmu periodu del añu anterior con un total de 4.528 nueves sociedaes, mientres que les baxes aumentaron un 12,31% con un total de 1.369 disoluciones, según un informe ellaboráu por Axesor. N'Asturies la creación d'empreses baxó un 57,46% y el númberu de disoluciones subió un 170%.

El PP d'Asturies alvirtió al Gobiernu que la subida d'impuestos pue ser la "del camín más fácil a la salida de la crisis, pero la de peores consecuencies" pa los ciudadanos. El cabezaleru del PP asturianu, Ovidio Sánchez, aseguró que subir los impuestos nun significa qu'aumente la recaudación y añadió qu'esa propuesta respuende a la falta d'idees y soluciones.

Unión Asturianista, coalición qu'axunta al Partíu Asturianista y a Unión Renovadora Asturiana, va celebrar el so actu conmemorativu del "Día de la Nación Asturiana" na capital del conceyu de Villaviciosa, del que ye alcalde Manuel Busto, miembru de la coalición. L'actu va entamar a les 13:00 hores na plaza de Xosé Caveda y Nava y va consistir "nun homenaxe al prócer villaviciosín y a la memoria asturianista de so pá y de los Xovellanos, durante’l cualu va haber sendos discursos políticos de Javier López Uría y de Xuan Xosé Sánchez Vicente".