El conseyeru de Mediu Rural y Pesca, Aurelio Martín, participó güei nos actos de celebración del marcaxe del exemplar 1.500, nel llibru xenealóxicu de gochu asturcelta.
   Na so intervención, Martín recordó que'l so departamentu ta acabante de firmar los convenios triañales coles asociaciones de criadores de races autóctones por valor de casi cinco millones d'euros.

La organización ecoloxista Greenpeace solicitó güei al gobiernu asturianu qu'abandone definitivamente'l "despropósitu" de basar la so xestión de residuos na incineración, descartando la construcción d'una incineradora en Serín (Xixón).
   Al traviés d'un comunicáu, señaló que'l Principáu debería optar por alternatives que protexan la salú de les persones y impliquen una reducción d'emisiones de gases d'efectu ivernaderu.

Demanda información sobre los proyectos, la venta de promociones y el futuru de la empresa pública ante la marcha de Caicoya

El Conseyu de Ministros concedió a los representantes de la Corriente Sindical d'Izquierdes (CSI), Juan Manuel Martínez Morala y Cándido González Carnero la rebaxa de la pena de cárcel impuesta de trés a dos, a cambiu del pagu al Conceyu de los 5.624,83 euros d'indemnización pola rotura de la cámara de videuvixilancia demientres les movilizaciones de Naval Xixón y el nun cometer delitu dolosu nel plazu de cuatro años. Pa los dos procesaos, l'indultu ye "otra trampa pa siguir amordazando a la clase trabayadora".

La Mesa y la Xunta de Voceros de la Comunidá Foral de Navarra decicieron ayeri abrir un plazu de 15 díes pa la presentación d'enmiendes a la proposición d'Izquierda Unida de modificación de la Llei del Vascuence, que plantega l'ampliación de la llamada zona mista, onde l'esquera nun ye oficial, pero sí se reconoz el derechu del ciudadanu y usalu, y pue requerise o valorase como méritu en dalgunos puestos de l'Alministración, de la mesma manera que la Llei de Promoción y Usu del Asturianu.

L'historiador Rafael Rodríguez Valdés analizará güei, na presentación del so llibru 'Discursos llingüísticos y movimientu obreru na Asturies decimonónica', el motivu pol que la clase obrera asturiana utilizaba la llingua tradicional pa espresase davezu, pero nun la usaba'l so movimientu organizáu nel so discursu oficial. Nesti sen la so conclusión ye franca: la razón yera que les clases dominantes se distanciaben d'esti idioma por razones clasistes y les populares, na práctica, asumíen esta idea.

El númberu d'hipoteques rexistraes n'Asturies demientres el pasáu mes de xunetu foi de 206 por cada 100.000 habitantes, datu inferior nun 9,9 por cientu del mismu mes del añu pasáu. Nel casu del Estáu, la media foi de 267 hipoteques por cada 100.000 habitantes, un 15,5 por cientu menos qu'en xunetu del 2008.

La Conseyería de Cultura y Turismu del Principáu d'Asturies publica güei nel Boletín Oficial del Principáu d'Asturies (BOPA) la resolución pola que se resuelve la convocatoria de sovenciones pa la restauración de molinos y otros inxenios hidráulicos, con una cifra total de 119.99,85 euros.

El músicu y musicólogu, Julio Sánchez, autor de la tesis doctoral 'La percusión tradicional en la cornisa cantábrica', destacó güei'l nivel de conservación de los instrumentos de percusión n'Asturies, tanto de los más conocíos como la pandereta, como otros más llocalizaos en puntos mui concretos de la xeografía, como la payel.la, típica de los conceyos vaqueiros.

La Fundación Oso Pardo (FOP) volvió referise güei a l'actitú del Fapas en rellación cola reintroducción de la osa Villarina y aseguró, al traviés d'un comunicáu, que'l Fapas "miente cuando tapez qu'existió un acuerdu tomáu nel conceyu del día 23 de setiembre del 2008 nel qu'hubo una propuesta del Principáu, pola qu'había un únicu representante ante los medios de comunicación demientres l'operativu".