L'asociación cultural y mediuambiental "La foz del Pielgu" entama esti sábadu 5 de setiembre les III Xornaes de la cultura asturiana, que van desarrollase nel centru Tomás y Valiente de Les vegues, nel conceyu de Corvera. Dende les 11:00 hores de la mañana diferentes especialistes van realizar una serie de ponencies alredor de la figura del castru del Picu Castiello, llugar onde alcontróse la estela antropomorfa de Molleda.

Alex Salmond, primer ministru del Gobiernu d'Escocia y cabezaleru del Scottish National Party (Partíu Nacional Escocés) ta acabante de presentar nel parlamentu d'esi país una serie de proyectos de llei pa esti cursu políticu, ente'l que rescampla un proyectu de llei que tien como oxetivu celebrar un referéndum en 2010 onde los escoceses decidan si quieren siguir nel Reinu Xuníu o bien escueyen independizase.

La directora xeneral de Política Llingüística, Consuelo Vega, recordó que'l Partíu Popular votó a favor de la propuesta de revisión de los topónimos tradicionales de Siero, qu'incluyía l'únicu términu de La Pola pa la capital. Tachó de "irresponsables" a la Xunta Llocal de la formación por criticar el llistáu de términos, acabante d'aprobase pol Conseyu de Gobiernu.

El Gobiernu asturianu ta acabante d'aprobar la concesión de les "Medayes d'oru y plata d'Asturies 2009", unos galardones que quieren dsitinguir a persones o colectivos representativos del nuesu país y que s'entreguen nuna ceremonia coincidiendo coles celebraciones del Día d'Asturies. Una d'estes distinciones, la medaya de plata, va dir pal míticu grupu Nuberu. estos galardones fueren propuestos n'agostu pasáu.
 

Les XIV Xornaes del Cómic Villa d'Avilés entamen coles esposiciones de los illustradores españoles Miguel Ángel Martín y Rubén Pellejero. Estes dos esposiciones, d'un total de cinco, suponen l'entamu d'unes sesiones que se van prollongar la próxima selmana.

Na reunión selmanal del Conseyu de Gobiernu ta acabante d'aprobase’l decretu qu’afita la nueva toponimia oficial del conceyu de Parres. Les nueves denominaciones, aprobaes pola Xunta de Toponimia y yá col preste del Gobiernu asturianu, pasen a tener la consideración de denominaciones oficiales. Hasta agora un total de 40 conceyos del país oficializaron los sos topónimos tradicionales y otros 20 entamaron esti procesu.

El Parque Natural de Fuentes del Narcea, Degaña y Ibias sufrió dende'l domingu un incendiu qu'afeutó a unes 200 hectárees, según informó la conseyería de Mediu Ambiente al traviés d'una nota prensa. La zona quemada ta definida dientro del Plan Rector d'Usu y Xestión (PRUG) del parque como zona d'usu agropecuariu, ye dicir, un área con una fuerte presencia de les actividaes agrícoles y ganaderes y que se ve sometida a una mayor presión, manexu y esplotación de recursos per parte de la población.

La Fundación Juan Muñíz Zapico, venceyada a Comisiones Obreres d'Asturies, ta acabante de convocar la sexta edición del Concursu de Rellatos Mineros Curtios "Manuel Nevado Madrid". Nelli pueden presentase obres n'asturianu y en castellán. El testu ganador tien un premiu de 1.000 euros y cuenta amás con un accesit n'asturianu dotáu con otros 600. Los rellatos deben falar necesariamente de dalgún aspeutu (motivos temáticos, personaxes, argumentu o ambientación) venceyáu col mundu de la minería de cualquier país.

La diputada del PP na Xunta Xeneral del Principáu, Inmaculada González, aseguró que n'Asturies hai 23.000 persones que nun cobren nengún tipu de sovención y destacó que los 22 millones previstos nel presupuestu del 2009 "nun son abondo pa los 20.000 beneficiarios del salariu social básicu".

Los Verdes d'Asturies denuncien que'l Conceyu de Cuideiru lleva una selmana faciendo grandes obres de desmontes y movimientos de tierres na redolada de la Turbera de las Dueñas y nel límite de la zona de protección del llitoral (zona POLA). Según Los Verdes esta actuación "ye illegal, yá que se ta faciendo contraviniendo la obligación de realizar y aprobar previamente un Estudiu Preliminar d'Impacto Ambiental, y ensin l'autorización previa de los organismos que deben informar o autorizar l'actuación".