La presidenta del PP de Xixón y diputada nacional, Pilar Fernández Pardo, aseguró güei que'l so partíu encamentará a la Fiscalía qu'esclare los escesos de coste d'El Musel si nun s'abre una Comisión d'Investigación, preferiblemente na Xunta Xeneral del Principáu, anque nun descartó apoyar la iniciativa del diputáu d'IU, Gaspar Llamazares, de solicitala nel Congresu de los Diputaos. "Vamos llegar a onde tengamos que llegar", dixo.

La Mesa de la Cámara refugó, por un defectu de forma, la propuesta de resolución rexistrada pol Grupu Parlamentariu del PP, na que se solicitaba l'abertura d'una comisión d'investigación pa esclarar tolo rellacionao coles obres d'ampliación del puertu d'El Musel.

El presidente del Principáu d'Asturies, Vicente Álvarez Areces, mostró la so confianza en que'l Gobiernu asturianu llegará enantes d'últimos d'añu a acuerdos p'aumentar les conexones aéres dende l'aeropuertu de la rexón, "hasta con más d'una compañía", dao qu'aeguró que les conversaciones con elles "tán mui avanzaes".

Unidá Nacionalista Asturiana refugó l'actitú del Partíu Popular na Comisión de Cultura del Ayuntamientu, al abandonar un plenu del mesmu pola presentación de dos espedientes escritos dafechu en llingua asturiana. Pa la UNA  esta actitú "ye un reflexu del despreciu del PP pa cola llingua y la cultura del país, al tiempu que dexa a les clares la facilidá que tienen los grupos políticos n'Asturies pa saltar penriba de la llegalidá no tocante al asturianu".

El Conceyu Universitariu pol Asturianu (CUPA) mostró la so felicitación al Rectoráu pola "aprobación oficial d'estudios n'asturianu", en referencia a l'aceptación, per parte del Conseyu de Gobiernu de la Institución, de los cuatro nuevos títulos de grau de la Facultá de Filoloxía, qu'inclúin el Minor de Llingua Asturiana, "títulu que pon a esti idioma la primer vegada nel sistema oficial d'enseñances".

El Conceyu de Cultura Tradicional Vezos Astures, "dedicáu y enfotáu dende hai años a la recuperación y espardimientu de la cultura tradicional", entama esti sábadu 26 de setiembre una xornada cola música tradicional nel tendayu del Pueblu d’Asturies en Xixón.

El Sporting podría dicise que salvó un puntu n'El Molinón frente a un Zaragoza que foi meyor a lo llargo de casi tol partíu. Mientres los visitantes dominaron el xuegu, abrieron el campu y llegaron al área en numberoses ocasiones, un irreconocible Sporting limitóse a xugar a arreones, con un centru del campu desapaecíu y un ataque casique inéditu. En definitiva un puntu qu'hai que dalu por bonu.

El Conseyu de Gobiernu de la Universidá d'Uviéu ta acabante d'aprobar los cuatro títulos de grau nos que se dividirán de magar agora los estudios de la Facultá de Filoloxía, dientro del Espaciu Européu d'Educación Superior, al que se tán adautando les enseñances universitaries. Nellos, inclúise'l Mínor d'Asturianu, títulu menor qu'integra la primer vez la llingua asturiana nos estudios de la Institución.

Los representantes del Partido Popular de Mieres abandonaron esti miércoles la comisión informativa de Cultura ante la presentación per parte de la presidenta de la comisión, la edil Diana González, de dos espedientes n'asturianu, concretamente los relativos al premiu Teodoro Cuesta, de poesía, y a la entrega de premios del Memorial Silvino Argüelles.

Dientro de les actividaes previstes pa esti xueves n'Arribada, la editorial Araz Llibros va presentar a les 18:30 hores nel Centru Antiguu Institutu de Xixón la obra “Mal de llingües. Alredor de los prexuicios llingüísticos” de Jesús Tuson Valls, caderalgu de llingüística de la Universitat de Barcelona, nuna traducción d’Héctor Gil. Esta obra, rigurosa y amena, ye una defensa de la diversidá llingüística de la humanidá y algamó les 29 ediciones en catalán.