El presidente del Principáu Vicente Álvarez Areces, anunció que'l presupuestu autonómicu pal añu 2010 va incluyir la conxelación salarial d'altos cargos. Según esplicó'l presidente asturianu nel trescursu del so discursu inicial nel Alderique d'Orientación Política que se celebra dende esti miércoles na Xunta Xeneral del Principáu, trátase del segundu añu sigíu nel que s'adopta la mesma midida. Tamién opinó que la comunidá ta yá nel camín de la recuperación de la crisis.

El conceyal del Ayuntamientu de Xixón de Cooperación y Cultura Tradicional, Jesús Montes Estrada, presentó en rueda prensa la programación de la Feria de San Miguel, que se celebrará los díes 26 y 27 nel Muséu del Pueblu d'Asturies, y que coincide colos actos d'Agropec (Feria del Campu y de les Industries Agrícoles, Ganaderes, Forestales y Pesqueres), nel recintu ferial del 25 al 27.

La presidenta del PP de Xixón y diputada Pilar Fernández Pardo, presentó nel Congresu de los Diputaos una entruga dirixida al Ministeriu de Fomentu na qu'entruga polo que va pagar la compañía Enagás polos terrenos de la regasificadora n'El Musel (Xixón). "¿Qué cantidaes ha abonar la compañía Enagás, y por qué conceptos, a l'Autoridá Portuaria de Xixón pola instalación nos terrenos del puertu d'El Musel d'una planta regasificadora?". Ye'l conteníu lliteral de la pregunta, según informó'l PP.

L'espertu en filoloxía y lliteratura lleonesa, Nicolás Bartolomé Pérez, autor del ensayu 'Filandón. Lliteratura popular llionesa', destacó en Xixón el puxu lliterariu que nos últimos años ta esperimentando esti idioma, especialmente cola apaición d'una editorial n'Astorga que lu ta promoviendo, Filandón. Asina lo esplicó demientres la so intervención nel marcu del programa d'actividaes de les xornaes culturales y lliteraries 'L'Arribada 2009', que se celebren estos díes na villa xixonesa.

Los sindicatos d'educación SUATEA y CSIF convoquen a una concentración esti miércoles 23 de setiembre a les 18:00 ante la Xunta Xeneral del Principáu pa "desixir el cese de la política discriminatoria nel ámbitu de la enseñanza pública asturiana, tres les declaraciones feches por dalgunos miembros del gobiernu nel sentíu de que se diben a mantener les práctiques discriminatories".

El presidente del Principáu d'Asturies, Vicente Álvarez Areces, aseguró que l'alta velocidá llegará al Principáu nel 2012, tal y como comprometió'l ministru de Fomentu, José Blanco. Nesti sen, Areces indicó que "ye mui fácil facer calendarios porque lo difícil ye cumplilos", y añadió que "dalgunos calendarios ellaboraos en L.luarca --en referencia al ministru de Fomentu del PP, Francisco Álvarez Cascos-- nun se cumplieron".

La instalación d'una regasificadora nos terrenos d'El Musel en Xixón va p'alantre col sofitu del Gobiernu asturianu. El Presidente Vicente Álvarez Areces asistió ayer a la entrega de los terrenos nel puertu xixonés a favor d'Enagás. Pal gobiernu ye "una infraestructura clave pal desarrollu de la Estratexa Enerxética d'Asturies y un pegoyu fundamental de la Planificación Enerxética Nacional".

L'Atenéu de Turón (conceyu de Mieres) va acoyer un taller d'instalación del sistema operativu Ubuntu n'asturianu'l próximu xueves y vienres. Concretamente'l xueves 24 a les 19:00 hores va desendolcase una charra d'iniciación a Ubuntu y el vienres 25 a les 16:30 va tener llugar el taller d'instalación d'Ubuntu. Esa iniciativa parte de Softastur y como n'otres ocasiones pretende "enseñar y/o instalar a tolos interesaos un sistema operativu que-yos permita manexar un ordenador n'asturianu dafechu".

El sindicatu d'enseñanza SUATEA afita que "l'aumentu n'Asturies de 1.921 alumnos, un 1,56% respective del cursu anterior, anunciáu pola Conseyería d'Educación, ta acompañáu d'una disminución del profesoráu contratáu p'atendelos". Según el sindicatu tan amenorgando les hores que s'utilizaben p'apoyos, dexando "d'atender los casos del alumnáu que necesite especial atención, perxudicando una eficaz atención a la diversidá" d'estos.

Dende'l Conceyu por Otra Función Pública n´Asturies recuerden que'l "14 de setiembre el Tribunal Superior de Xusticia d´Asturies sacudio-y al Gobiernu asturianu otru estacazu asemeyáu al que-y diere’l pasáu mes de xunu cola anulación de la mal llamada 'carrera profesional'" y acusen al executivu asturianu d'intentar manipular a la opinión pública nesti asuntu.