L'ALLA celebra'l pieslle oficial de los sos XXVII Cursos de Branu

El Rector de la Universidá d’Uviéu y la Presidenta de l’Academia de la Llingua piesllen oficialmente los XXVII Cursos de Branu. L’actu va ser esti vienres 18 de setiembre, a les 18:00 hores, nel Paraninfu de la Universidá d’Uviéu (c/ San Francisco).
 
A lo llargo del actu, que se fairá dafechu n’asturianu, intervendrán el direutor de los Cursos de Branu, D. Xosé Antón González Riaño, la Presidenta de l’Academia, Dña. Ana Mª Cano González, y el Rector de la Universidá d’Uviéu, D. Vicente Gotor.

Nesta edición de los cursos participaron más d’un centenar de persones nos niveles que s’impartieron: Cursu Elemental de Llingua Asturiana, Cursu Avanzáu de Llingua Asturiana, Cursu de Capacitación pa la Traducción al Asturianu —toos trés inxertos nos Cursos d’Estensión Universitaria de la Universidá
d’Uviéu—, los Cursos d’Afondamientu Cultural y Llingüísticu La presencia de la Llingua Asturiana n'Internet. Nueves posibilidaes, Otros xuegos y tradiciones populares na enseñanza, Ecoloxía y Mediu Ambiente n'Asturies, Cursu d'especialización en Filoloxía Asturiana, Ferramentas prá normalización llingüística del gallego-asturiano y la primer fase del Curso de Capacitación en Gallego-Asturiano.