El TSXA obliga al Principáu a caltener el conciertu al colexu d'educación diferenciada Peñamayor

|

El Tribunal Superior de Xusticia d'Asturies (TSXA) dictó un autu comunicáu nel qu'obliga a la Conseyería d'Educación del Principáu a caltener el conciertu educativu en primeru d'Educación Infantil al colexu Peñamayor. Con esta decisión, yá son los dos colexos d'educación diferenciada d'Asturies los que caltienen el conciertu, dempués de que'l pasáu 22 de xunetu el TSXA dictaminare otru autu concediendo la suspensión preventiva de la Orde de la Conseyería que suprimía'l conciertu al colexu Los Robles en primeru de Primaria.

   La decisión d'esti tribunal respuende a la solicitú formulada nun recursu contencioso-alministrativu presentáu por Fomentu de Centros d'Enseñanza SA, titular del Colexu Peñamayor. El recursu impugnaba una resolución del 6 de mayu del 2009 na que la Conseyería d'Educación del Principáu suprimía'l conciertu de la unidá concertada de Primaria d'Educación Infantil, pol supuestu carácter discriminatoriu por razón de sexu de la educación diferenciada.

   La Conseyería d'Educación del Principáu d'Asturies entendió que'l colexu Peñamayor incumplía 84.1 de la LOE, qu'establez que nel procesu d'almisión nun va haber discriminación por razón de sexu, al escolarizar sólo a neñes. Por esi motivu, declaró la supresión del conciertu de manera progresiva, de tal manera que les families nun diben tener derechu esti cursu al conciertu en primeru d'Educación Infantil, al cursu siguiente en primeru y segundu d'infantil, y asina nos cursos posteriores.

   Agora, la sala de lo contencioso-alministrativu del Tribunal Superior de Xusticia estima les midíes preventivos solicitaes pol centru y ordena a l'Alministración qu'adopte les midíes necesaries pa que'l centru d'enseñanza Peñamayor puea impartir en réxime de conciertu les trés unidaes d'educación infantil que venía teniendo, según recueye l'autu al que tuvo accesu Europa Press. La estimación d'estes midíes preventives afecta a unos 75 alumnos, según informaron fontes del centru educativu.

   La fundamentación xurídica del Tribunal Superior de Xusticia d'Asturies pa conceder la midida preventiva reconoz que "nun s'aprecia lesión de interés xeneral cola adopción de la midida preventiva solicitada mientres que pel contrariu, la plena efectividá inmediata del actu sí que produz perxuicios irreparables, por nun nun tar espuetos a valoración económica al reducise'l númberu d'unidaes concertaes".

   Esti autu del Tribunal Superior de Xusticia d'Asturies ye'l segundu que se dictó sobre esta cuestión n'España, dempués de que'l pasáu 22 de xunetu esti mesmu tribunal concediere'l caltenimientu del conciertu al Colexu Los Robles. Amás, ye'l primeru que resuelve de manera preventiva la llexitimidá de la financiación pública de la educación diferenciada, nuna etapa non obligatoria, como'l segundu ciclu d'Educación Infantil.

 

Contador Estadistiques