La Universidá d'Uviéu abrió güei'l plazu d'inscripción de la tercer edición del cursu de trabayu de campu en toponimia, dialectoloxía y cultural popular, que dirixe'l profesor Fernando Álvarez-Balbuena, cola collaboración y promoción de la Conseyería de Cultura. Asimesmo l'asociación El Teixu entama'l "I Cursu d'Encuestadores de Dialectoloxía y Toponimia", que va desendolcase los díes 19 y 20 de setiembre y 3 y 4 d'ochobre.

La edil de Cultura del Conceyu de Mieres, Diana González, anunció que l'Ayuntamientu prevé inaugurar el Centru d'Estudios de l'Asturianá, más conocíu como muséu de la toná, el próximu mes d'ochobre. La conceyal esplicó que les obres d'adautación del xalé que va ocupar la instalación yá acabaron y apuntó que nestos momentos tán equipándose la infraestructures, que van contar con espacios pa la investigación, pa llabores alministratives y p'actividaes.

El Colectivu Ecoloxista denunció al Principáu un nuevu vertíu d'una sustancia oleaxinosa na ría d'Avilés, asegurando que se pudo apreciar na marea baxa pero que se produxo cuando la marea taba alta, a les 17.00 hores --al atopase pexes muertos enriba de les piedres--. Según los ecoloxistes apaecieron decenes de pexes muertos nel tramu del paséu de la ría nes dos marxes, dende la salida del colector de bateríes hasta'l Puente Azud.

El Boletín Oficial del Principáu d'Asturies asoleyó esti llunes 13 de setiembre'l Decretu 112/2009, de 2 de septiembre, pol que s'afiten los topónimos oficiales del conceyu de Parres. La nueva toponimia foi aprobada na reunión selmanal del Conseyu de Gobiernu del pasáu día 2. Les nueves denominaciones, aprobaes pola Xunta de Toponimia y yá col preste del Gobiernu asturianu y asoleyaes nel BOPA, pasen polo tanto a tener la consideración de denominaciones oficiales.

L'alcuentru lliterariu "Arribabada. Vagamar lliteraria y cultural" entama esti llunes 14 de setiembre la so edición 2009 con un programa que va desendolcar hasta'l sábadu 3 d'ochobre un bon númberu d'actividaes alrodiu de la lliteratura asturiana. Nesta ocasión les xornaes van tener llugar nel Centru de Cultura Antiguu Institutu (CCAI) y nel Muséu del Ferrocarril de Xixón, y tamién nel Centru Polivalente de la Plaza Obdulio Fernández de Villaviciosa.

Una de les cites más importantes cola música del país, los Alcuentros de Trebolgu, celébrase esti llunes 14 de setiembre, en plenes fiestes de San Matéu d'Uviéu. La cita va ser a les 21:30 hores na plaza de la Catedral de la capital asturiana y va contar cola actuación de la banda de gaites "Ciudad de Oviedo", la bandina de música tradicional "La Curuxa" y el perconocíu grupu de rock "Dixebra".

El vienres día 11 celebróse nel Salón d’Actos de la Biblioteca Pública Xovellanos de Xixón la charra “Les fuerces polítiques propies n'Aragón y n'Asturies”, na que Gregorio Briz pola Chunta Aragonesista y Faustino Zapico por Unidá Nacionalista Asturiana fixeron un repasu a les coincidencies y diferencies ente’l procesu de construcción de proyectos nacionalistes d’izquierda tanto n’Asturies como n’Aragón.
 

El Sporting de Xixón algamó na segunda xornada de Lliga'l primer trunfu ante un Almería feble. Los sportinguistes desendolcaron un xuegu que dexó un tastu mui positivu de cara al futuru del equipu asturianu na máxima categoría. Contundencia en defensa y efectividá n'ataque fueron l'amiestu necesariu pa sumar los trés primeros puntos nun partíu nel que los fichaxes roxiblancos aprobaron con nota.

La Xunta de Personal Docente non Universitariu alvirtió güei de "recortes y desbarafuste" na Conseyería d'Educación ante l'entamu del cursu escolar. Según informó'l colectivu nuna nota prensa, produxéronse "abondos errores" na axudicación del profesoráu n'especativa, en práctiques y interinos, pola desapaición de les places al llegar el profesoráu a tomar posesión.

L'Índiz de Precios de Consumu (IPC) subió nel nuesu país demientres el pasáu mes d'agostu un 0,4 por cientu, penriba de la media estatal asitiada nel 0,3%, según datos espardíos güei pol Institutu Nacional d'Estadística (INE). No que va d'añu, los precios baxaron na comunidá un 0,6 por cientu, cuatro décimes más que la media estatal (-0,2 por cientu); mientres que la inflación asturiana algamó'l -1,1 por cientu; Castiella y Lleón y Aragón (-1,3%) y Navarra (-1,2%).