Continúen les actividaes de l'Arribada 2009

|

Esti 16 de setiembre les activiadaes de l'Arribada continúen en Xixón. Concretamente a les 18 hores nel patiu del Centru de Cultura Antiguu Institutu va ser la inauguración de la esposición "Buelga Astur" coles obres finalistes del II Concursu de Fotografíes de Tierra Astur. Cada obra fotográfica acompáñase "con unos versos d'un/a poeta asturianu/a, en llingua asturiana o gallego-asturianu, venceyaos a la temática de la semeya".
 
Los escritores que s'esbillaron son Pablo Antón Marín Estrada, Fredo de Carbexe, Luis Salas Riaño, Humberto Gonzali, Antón García, Pablo Rodríguez Medina, Esther Prieto, L.luis Fernández, Aurora García Rivas, Ignaciu Llope, Marisa López Diz, Nené Losada Rico, Sabela Fernández, Xandru Fernández, Naciu i Riguilón, Lourdes Álvarez, Aurelio G. Ovies, Xosé Miguel Suárez, Roberto González-Quevedo, José Luis Rendueles y Xosé Bolado.
 
Asimesmo na sala de conferencies, allugada nel primer pisu, a les 19,30 hores, proyectaráse'l clásicu "Das Cabinet des Dr. Caligari" ("El gabinete del doctor Caligari"), subtituláu n'asturianu.

INAUGURÓSE UNA ESPOSICIÓN DEDICADA AL BARÍTONU Y ACTOR ASTURIANU ANTONIO MEDIO

 
Nel Centru Cultural Antiguu Institutu de Xixón inauguróse la esposición dedicada al barítonu y actor Antonio Medio (Xixón, 1911-1977), contando con una presentación de los conteníos a cargu del dramaturgu Boni Ortiz, comisariu de la esposición. La muestra consta de 14 paneles esplicativos de la vida y obra d'esti artista, que grabó numberosos discos de zarzueles d'éxitu como "Campanas de Madrid", con música del maestru Jesús Romo, y que trabayó nes compañíes de Celia Gámez o Cifesa, entre otres. Pal 'Barítono de la Voz de Hierro', sobrenome col que se conocía a Antonio Medio, escribieron autores como Fernández Shaw, Felipe Seoane, Serano Anguita, Carreño, Lozano y maestros como Romo, Alons, Guerrero , o Sorozabal.

Grabó nun discu, xunto con Matías Prats padre, la famosa "polémica" "Andalucía y Asturias", de Diego Terrero y Teodoro Cuesta. Foi, amás, el creador de la Compañía de Arte Asturiano, unu de los intentos más serios de profesionalización, arriesgaos y con meyores resultaos escénicos de la llarga historia del teatru costumbrista asturianu. Esta esposición sobre Antonio Medio permanecerá abierta hasta'l 30 de setiembre.

Contador Estadistiques