El direutor de conteníos de TPA, Juan José Guerenabarrena, dixo que  la televisión pública nun tien presupuestu pa un segundu canal. Asina lo dixo mientres la celebración de la xornada “Perspectives y retos de la industria audiovisual asturiana”, qu’empobinó en Llangréu l’Asociación d’Empreses de Producción Audiovisual d’Asturies.

El reelixíu como secretariu xeneral de MCA-UXT, Eduardo Donaire, despidióse güei del secretariu xeneral de la Federación Socialista Asturiana (FSA-PSOE), asegurando que-y prestaba volver a velu dientro de cuatro años como presidente d'Asturies.

Según informaron asistentes al actu d'Europa Press, el diálogu caltúvose demientres la despidida ente ambos al términu del XII congresu rexonal de la orgnaización sindical, que se celebró nel Auditoriu d'Uviéu, y nel que Donaire salió reelixíu col 82,59 por cientu de los apoyos.

Suatea vien de denunciar la situación de dalgunos Auxiliares Educadores y Fisioterapeutes de dellos colexos d'Asturies. Según el sindicatu, l'Alministración nun los contrata por cursu completu y el Principáu, pudiendo iguar la situación, nun lo lleva a Conseyu de Gobiernu pa la so aprobación. Polo que'l sindicatu esixe que la selmana viniente seya un puntu de l'axenda, asina como la so espublización nel BOPA.

El coordinador d'Unidá Nacionalista Asturiana, Miguel Ánxel Díez, anunció al traviés d'un comunicáu que la so organización va inxertar nos sos principios el manifiestu en defensa de los drechos fundamentales d'internet. La organización cuenta facelu nel so alderique congresual, que tendrá llugar en febreru de 2010.

21.946 ye’l númberu total d’escolinos que deprenden la nuesa llingua nos colexos ya institutos nesti cursu 2009/2010. Sicasí, los datos son bien estremaos según el nivel. Mientres na educación primaria’l 90,6% de los centros ufren llingua pal 55,4% de los escolinos (17.053 matriculaos), vemos como nel Bachilleratu namás hai matriculaos 374 alumnos (el 3,7%) nos 24 institutos, d’un total de 71, qu’ufren l’asignatura.

El Secretariu de Llingua del sindicatu educativu Suatea, Xosé Lluis Colodrón Ardura, presentó güei’l llibru que recueye les actes y les conferencies de les primeres “Xornaes de llingua asturiana y educación”. Un documentu onde se fai un repás pela situación de les llingües minoritaries y se fai comparanza col casu asturianu, p’asina sirvir de guía al profesoráu y que l’Alministración camude la so política, en pallabres de Colondrón.

Un 83% de los catalanes camienta que’l so país tien drechu a decidir llibremente’l so futuru políticu, mientres que’l 50’3% votaría sí nun hipotéticu referéndum pola independencia. Asina lo recueye una encuesta del Institutu DYM encargada pola Universitat Oberta de Catalunya, de la que se fai ecu’l diariu “Avui”. La encuesta fízose a 2.614 persones nos díes posteriores al 13 de setiembre, fecha de la primer consulta pola independencia n’Arenys de Munt.

L'investigador del Institutu Xeolóxicu y Mineru d'España (IGME), coordinador científicu del proyectu d'ampliación de la plataforma continental española y aesor del Ministeriu d'Asuntos Esteriores nestes materies, presentó güei n'Uviéu los trabayos d'investigación que llevarán a España a estender la so plataforma continental, tanto nel Cantábricu como en Galicia. Trátase de trabayos que se presentaron na sede de la Convención de Naciones Uníes sobre'l Derechu de la Mar en Nueva York (EE.UU), pola delegación española.

Pa la portavoz d’UNA en Xixón, Yolana González, el pieslle de Juliana podía evitase con una correcta xestión política, polo que culpa a los responsables políticos “de dexar albentestate a los trabayadores del sector naval”, citando sobre too al secretario xeneral del PSOE xixonés, José Manuel Sariego, que según la organización ausentóse de les manifestaciones cuando entá se podia lluchar pol naval y agora ofrezse a encabezales.