Xentiquina cánta-y al "Sapu y la lluna" nel so nuevu discu

El coru de neños del Colexu Públicu de Lieres que dirixe'l maestru Nacho Fonseca saca nuevu discu. Nesti casu llámase "El sapu y la lluna" y presenta la novedá de fuxir de los soníos sintetizaos pa cuntar cola participación de músicos bien conocíos dientro del panorama asturianu como Rubén Bada (vigulín), Eladio Díaz (saxu), Roberto Tana (batería) o Sergio Rodríguez (baxu y guitarra), pertenecientes a formaciones como Dixebra, DRD o Herbamora.
El discu, que ta editáu pola compañía L'Aguañaz, contién doce cantares compuestos pol propiu Nacho Fonseca, calteniendo asina'l llabor qu'entamara col grupu Seliquín nel pueblu llaniscu de Porrúa.
Nesti tiempu, el so llabor vien siendo mui apreciáu polos docentes d’asturianu, que tienen nos discos de Xentiquina un apoyu bien importante pa les clases, incluyéndose los sos cantares nos manuales d'enseñanza de tolos ciclos. Nesti sen, "El sapu y la lluna" inclúi tamién les canciones en versión Karaoke pa que s’usen na docencia colos escolinos y escolines que dan l’asignatura d’asturianu. Asina mesmo, esti añu, y dientro de les actividaes ufiertaes na Axenda Didáctica Escolar, esos mesmos neños y neñes van poder disfrutar del grupu Xentiquina, y quien sabe si de les sos nueves canciones.