El Conceyu Universitariu pol Asturianu (CUPA) vien d’amosar la so gayola pol nomamientu de Vicente Gotor, Rector de la Universidá d’Uviéu, como patronu d’honor de la fundación Caveda y Nava, distinción que se fairá efectiva mañana 28 de payares en Villaviciosa. Pal CUPA’l nomamientu supón un reconocimientu a los pasos yá daos nel primer añu y mediu de mandatu del cabezaleru universitariu, pero sobre manera a les espectatives abiertes pol Rector pa la normalización del asturianu.

El director del Serviciu Asturianu Públicu d'Emplegu, José Luis Álvarez, animó güei en Xixón a los mozos desemplegaos a que vean nello una oportunidá p'aprovechar esti tiempu que tán nel paru a formase, de cara a tar meyor preparaos una vez que se salga de la crisis. Asina lo dixo dempués de visitar les intalaciones de dos escueles taller en Xixón, 'El Coto', y 'EGijón II', la primer d'elles dirixida, como novedá n'esclusiva a persones con discapacidá.

El Comité del Estáu español del European Bureau for Lesser-Ussed Lenguages (Axencia Europea pa les Llingües Minorizaes) encamentó güei a la Xunta de Galicia que "ponga fin a les inciatives que tomó nos últimos meses a la escontra del idioma gallegu".

El rector de la Universidá d'Uviéu, Vicente Gotor, será dende mañana nuevu patronu d'honor de la Fundación Caveda y Nava, títulu concedíu en reconocencia del so llabor pa "destorgar" la situación de la llingua asturiana en dellos ámbitos universitarios.

Asina lo explicó en declaraciones a Europa Press Ramón d'Andrés, ún de los responsables de la Fundación y miembru del Seminariu de Filoloxía Asturiana de la Universidá.

La sección primera de la sala de lo penal de l’Audiencia española fixó pal 15 y 16 d’avientu’l xuiciu contra cinco periodistes del diariu vascu “Egunkaria” procesaos por pertenencia o collaboración con banda armada. El xuiciu convócase seis años depués de que’l xuez instructor de l’Audiencia Nacional, Juan del Olmo, ordenara’l pieslle temporal y l’embargu preventivu de los sos bienes por, presuntamente, formar parte del conglomeráu empresarial controláu por ETA.

Onde asociaciones d’Aragón, Valencia, Baleares y Cataluña axuntáronse nun manifiestu que presentaron ayeri en Madrid pa denunciar la “agresividá del nacionalismu catalán”. Asina, anuncien “acciones xudiciales y movilizaciones populares” pa impidir la “imposición de la llocura del nacionalismu dixebraor” sobre les “llingües propies de los territorios” y el castellán.  

L’Asociación xuvenil Mezá va desendolcar la segunda xornada del II Outono Cultural el próximu 5 d’avientu nel conceyu de Bual. La xornada va entamar a les seis de la tarde na Casa de Cultura de la localidá cola conferencia de los espertos en cultura tradicional Xosé Antón Fernández Ámbas y Guillerme Ignacio Costa (Quempallou) titulada “A tradición oral en Asturias y Galiza: culturas ermás”. Les actividaes finarán a les ocho col conciertu del grupu folk local Mezá.

El presidente del Principáu d'Asturies dixo güei que'l presupuestu rexonal pal 2010 ye un exerciciu de responsabilidá del Gobiernu asturianu que pon en práctica'l pactu soscritu n'ochobre del 2008 cola coalición IU-BA-Los Verdes, y que permitirá a Asturies continuar nel camín de la recuperación y salida de la crisis.

El Conceyu de Cabranes y la Sociedá Xeneral d'Autores y Editores (SGAE) llegaron a un acuerdu qu'acaba col pleitu pol qu'esta entidá reclamaba más de 6.000 euros en conceptu de derechos d'autor xeneraos en dellos eventos musicales. L'Ayuntamientu pagará a plazos la so deuda, que se verá reducida nun 25%, ye dicir, 4.541 euros. El xuiciu, previstu pal próximu llunes, 30 de payares, nun se celebrará.

Los familiares de los represaliaos que podríen tar enterraos nel fueyu común de Cabal.leros, na población ayerana de Felechosa, defendieron güei los trabayos de desentierru que se tán desarrollando na zona dende'l sábadu de la pasada selmana. Trátase, señalaron, d'unos llabores que cuenten coles autorizaciones encesaries y que tienen como oxetivu "pesllar la firida ente les dos Españes cola recuperación de los restos enterraos en fueyos illegales".