Más de 21.000 escolinos deprenden asturianu

21.946 ye’l númberu total d’escolinos que deprenden la nuesa llingua nos colexos ya institutos nesti cursu 2009/2010. Sicasí, los datos son bien estremaos según el nivel. Mientres na educación primaria’l 90,6% de los centros ufren llingua pal 55,4% de los escolinos (17.053 matriculaos), vemos como nel Bachilleratu namás hai matriculaos 374 alumnos (el 3,7%) nos 24 institutos, d’un total de 71, qu’ufren l’asignatura.

Na ESO, la mayoría de centros de la enseñanza pública imparte l’asignatura, 87,3% del total. Pero namás hai 3.613 matriculaos (el 18,03%) en llingua asturiana.
 
La diferencia tamién ye bultable no que cinca a la enseñanza concertada. En primaria namás un 5,6% d’escolinos da l’asignatura nún de los diez colexos que la imparten (d’un total de 55). Mientres que na ESO son 5, d’un total de 57, los colexos que la ufren pa 196 matriculaos, el 1,9% del total.
 
Nel Navia-Eo son 387 los alumnos que deprenden eonaviegu. Un 22% del total en primaria, un 12,8% en secundaria y namás qu’un 2,5% nel Bachiller. Los datos de la Conseyería d'Educación foron facilitaos güei a los medios de comunicación pol sindicatu Suatea.