Suatea denuncia la discontinuidá de los maestros d'educación especial

Suatea vien de denunciar la situación de dalgunos Auxiliares Educadores y Fisioterapeutes de dellos colexos d'Asturies. Según el sindicatu, l'Alministración nun los contrata por cursu completu y el Principáu, pudiendo iguar la situación, nun lo lleva a Conseyu de Gobiernu pa la so aprobación. Polo que'l sindicatu esixe que la selmana viniente seya un puntu de l'axenda, asina como la so espublización nel BOPA.

Según diz Suatea, l'Alministración fai contratos por seis meses, al nun tener estes places la categoría de vacantes. Anguaño, ta pendiente de ser unviáu a Conseyu de Gobiernu una nueva RTP na que figuren dalgunes d'estes places cola categoría de vacantes, dando posibilidá de camudar el tipu de contratu pa que los Auxiliares y Fisioterapeutes siguieren nos sos puestos.

Sicasí, el Principáu lleva dos selmanes de retrasu na aprobación d'esta RTP, cuestión que Suatea califica como pergrave, yá qu'afeuta a alumnos con necesidaes educatives especiales, que necesiten sobremanera la continuidá del personal, yá qu'en munchos casos presenten problemes comunicativos. Resultando'l camudamientu de personal, como un nuevu periodu d'adautación y un pasu atrás nel deprendimientu pa estos alumnos.