El grupu de ska Falanoncaduca atópase trabayando nel local d’ensayu no que va ser el so primer discu, que s’asoleyará pal branu de 2010. Ensin nome afitáu, el discu tendrá ente 10 y 15 cantares, dalgunos yá interpretaos en direutu y otros que tán componiendo. Por mor de la preparación de la grabación, el grupu tará un tiempu ensin xubise al escenariu.

El presidente del Gobiernu d'Aragón, Marcelino Iglesias, recordó güei que l'aprobación de la Llei de Llingües ta pendiente dende hai 30 años, dao que'l primer Estatutu d'Autonomía, que data de 1982 yá establez la obligación de regular la proteición de les llingües minoritaries. Amás, dixo percibir que "hai una mayoría parlamentaria que permitirá aprobala".

La organización Andecha Astur sumóse güei, al traviés d'un comunicáu, al pidimientu de la Coordinadora Ecoloxista d'Asturies fechu tanto a l'Autoridá Portuaria de Xixón, como al conceyu pa que se paralicen "darréu" les obres de construcción de la regasificadora n'El Musel que, según dambos, nun cuenten cola llicencia municipal correspondiente pa la so execución.

La selección vasca nun va xugar per segundu añu’l so tradicional partíu de Navidá. Si l’añu pasáu foi pola negativa de los xugadores a vistir la camiseta d’Euskadi, en llugar del tradicional Euskal Herria, esti añu ye’l plantón de la Real Sociedad, que diz que nun quier xugar daqué que se ta convirtiendo nuna fiesta navidiega con tastu folclóricu.

Suatea vien de denunciar, al traviés d’un comunicáu, que la Conseyería d’Educación faiga un aumentu de la inversión na enseñanza concertada mui per riba del de la pública. Dalgo, que pal sindicatu, ye vezu d’unos años p’acó, lo que produz “la reducción y subordinación de la rede pública a los intereses de la empresa privada”.

Israel dio ayeri, ún d’avientu, instrucciones a los sos embaxadores de presionar a los gobiernos de la UE pa que nun reconozan Xerusalén Este como zona árabe. La ofensiva diplomática surde tres una iniciativa sueca, Estáu presidente de turnu de la Unión, pa que la selmana viniente los ministros d’Esteriores europeos soliciten la declaración de Xerusalén Este como capital palestina, amosando asina'l sofitu de la UE a una posible declaración unillateral pol pueblu palestín del so propiu Estáu.

El Colectivu Ecoloxista d'Avilés (CEA) solicitó güei que se detenga de manera preventiva l'actividá de la cantera avilesina de l'Atalaya, "ante los númberosos incumplimientos repetíos d'esta esplotación", y que se-yos informe del desarrollu del so espediente.

La Plataforma “No hablamos catalán” pidió-y ayeri, ún d’avientu, a los grupos del PP y PAR nes Cortes d’Aragón l’abandonu de la ponencia parlamentaria sobre la Llei de Llingües d’Aragón, yá que cola aprobación de la denominación de catalán que supón l’artículu 2 “elimínase l’aragonés que se fala na zona oriental y yá nun val la pena discutir namás”. Pa la Plataforma, los dos partíos “nun foron invitaos a la función” y van ser los aragoneses y les urnes “los encargaos de xuzgar esta imposición”.

El númberu de paraos rexistraos nes oficines del Institutu Nacional d'Emplegu (Inem) nel Principáu algamó en payares la cifra de 73.097 desemplegaos, lo que supón un aumentu de 2.310 paraos más sobre  ochobre, informó güei'l Ministeriu de Trabayu y Inmigración.

En términos relativos, l'aumentu del paru al acabar el mes de payares n'Asturies foi del 3,26 por cientu respeuto al mes anterior. En rellación a payares del 2008, el paru incrementóse en 14.846 persones, un 25,49 por cientu.

Xega, coleutivu LGTB d’Asturies, vien d’encamentar a los partíos, instituciones, alministraciones y sociedá en xeneral, responsabilidá y compromisu pa facer realidá l’accesu a una educación afeutivosexual integral, sobre too ente los más mozos. La organización aprovechó’l Día Mundial de Llucha contra’l Sida pa reseñar la importancia de la educación p’amenorgar el númberu de nuevos infectaos.