Suatea presenta un llibru sobre les Xornaes de llingua y educación

|

El Secretariu de Llingua del sindicatu educativu Suatea, Xosé Lluis Colodrón Ardura, presentó güei’l llibru que recueye les actes y les conferencies de les primeres “Xornaes de llingua asturiana y educación”. Un documentu onde se fai un repás pela situación de les llingües minoritaries y se fai comparanza col casu asturianu, p’asina sirvir de guía al profesoráu y que l’Alministración camude la so política, en pallabres de Colondrón.

Nel llibru, tán incluyíes les ponencies de xuristes y enseñantes que faen un repás a la normativa llegal de les llingües minoritaries nel sistema educativu dende l’ámbitu européu al asturianu, pasando pel estatal. Espertos d’otres realidaes educatives, como la gallega o valenciana, cuenten les sos esperiencies p’asina ser una guía pa los enseñantes d’asturianu
 
Suatea cuenta repartir los 500 exemplares del llibru poles escueles onde s’imparte asturianu. Amás, yá que’l llibru s’edita cola collaboración del Conceyu de Xixón, 50 exemplares del mesmu van distribuyise per biblioteques ya institutos de la ciudá. Del mesmu mou, Suatea va facer llegar el documentu a l’Alministración asturiana pa qu’asina “camude totalmente la so política educativa cola llingua”, según esclarió.
 
Xosé Lluis Colondrón tamién aprovechó pa denunciar énte los medios los problemes que tien la llingua nel sistema educativa. Calificó de preocupante que na Educación Infantil, “onde deberíen dir los mayores esfuercios”, nun esista l’asturianu. Polo que’l so sindicatu tien recurríu’l currículum d’infantil dende va un añu, denuncia que foi aceptada pol xuez.
 
Desplicó qu’esti añu namás tuvieron conocimientu de que nun institutu de Xixón nun se quixera dar llingua a un grupu d’escolinos por nun formase’l númberu mínimu de matriculaos, “anque la llei d’usu diz que l’asturianu tien qu’ufiertase en tolos niveles”, esclarió. Sicasí, ente les protestes del sindicatu, unes selmanes depués d’entamar el cursu, la Conseyería d’Educación intermedió y los escolinos comencipiaron a dar asturianu.
 
El Secretariu de Llingua de Suatea recordó tamién que l’asturianu nun esiste na FP, mientres que nel Bachilleratu y na ESO la so presencia “ye irrisoria”. Colondrón esclarió que mientres la llegalidá vixente fala de voluntariedá, l’Alministración sigui’l camín de la optatividá, poniendo l’asturianu a competir con otres asignatures na educación secundaria.

Contador Estadistiques