Los miembros del xuráu del Premio Xeira de Narracióis Curtias en gallego-asturianu alcordaron por mayoría otorga-y’l primer premiu al relatu curtiu “Amazonas” de Miguel Rodríguez Monteavaro. El galardón, creáu pola asociación Xeira pa promocionar l’usu lliterariu del eonaviegu, tien una dotación económica de 600 euros.

El presidente de la Confederación Asturiana de la Construcción, Serafín Abilio, pidó güei a los conceyos asturianos que cedan el so suelu dotacional, el reserváu pa diferentes servicios públicos, a les constructores privaes pa qu'éstes promuevan viviendes barates y pequeñes destinaes al alquiler pa los mozos.

Foi una propuesta que'l responsable de la CAC formuló enantes de la so intervención nunes xornaes sobre vivienda y mocedá organizaes pola Unión Xeneral de Trabayadores.

El presidente de l’Academia del Cine Catalán, l’actor Joel Joan, afitó güei nuna entrevista na radio pública catalana, que la entidá que preside ta en negociaciones cola so homóloga española pa qu’una película en catalán puea aspirar al Oscar en llingua non inglesa. La intención ye que la institución catalana escueya una película al empar que l'academia española esbillaría una en castellán.
 

Ecoloxistes n’Aición d’Asturies presentó alegaciones contra la concesión d’una llicencia d’actividá solicitada pola empresa ENAGAS pa una planta regasificadora n’El Musel. Los ecoloxistes quieren que s’anicie de nuevu’l procedimientu, al nun respetase los plazos llegalmente establecíos.
 

Llega’l fin de selmana y con él el tiempu llibre, dende Asturies.com recomendavos delles actividaes que se van empobinar esti fin de selmana. Teatru, música, lliteratura y esposiciones enllenen l’axenda d’ociu ástur.
 

El secretariu provincial del Partíu Socialista de Lleón (PSL), Francisco Fernández, aseguró güei que la formación política caltendrá la so postura a la escontra de la execución de la llinia d'alta tensión Sama-Velilla a pesar de ser una opinión diferente a la manifestada pol ministru d'industria, Miguel Sebastián.

El proyectu de Llei de Llingües d’Aragón incluirá la creación de dos instituciones llingüístiques dixebraes, una pal aragonés y otra pal catalán. Asina lo alcordaron PSOE y Chunta Aragonesista. El PP y el Partido Aragonesista, sociu de gobiernu de los socialistes, quieren una autoridá normativa con potestá pa les dos llingües. Mientres qu’IU propón una única academia pal aragonés, yá que camienta que la única entidá que tien que normativizar el catalán ye l’Institutut d’Estudis Catalans.

La lletra 'eñe', la ce con cedilla (ç), les tildes o les diéresis puen usase dende güei pa rexistrar nomes de sitios web de dominiu '.eu', asina como'l restu de los caracteres de les 23 llingües oficiales de la Unión Europea, incluyíos los griegos y cirílicos, según anunció la Comisión.

El Frente Polisariu amenazó esti xueves con retomar la llucha armada si la comunidá internacional fracasa nel so intentu d'alcontrar una solución al contenciosu del Sahara Occidental, que se prollonga dende hai más de 30 años y que volvió ocupar un primer planu na política española con motivu de la fuelga de fame que caltién dende hai 25 díes nel aeropuertu de Lanzarote l'activista Aminetu Haidar.

Unión Independiente de Carreño y Unidá Nacionalista Asturiana convoquen una concentración énte l'autoridá portuaria de Xixón el día 12 d'avientu a les12:00 hores, baxo'l lema “Carreño y Xixón escontra El Muselón”, p'amosar la so refuga al proyectu que supón esta obra, “y más en concreto polos perxuicios que van suponer pa Carreño y Xixón de forma más directa”, esclarien.