Efectivos del subgrupu de Ciberterrorismu de la Guardia Civil con sede en Madrid procedieron güei, a les 13.30 hores, a detener en Xixón a A.O.R., de 29 años d'edá, como supuestu autor d'un delitu d'allabancies al terrorismu al traviés d'Internet. L'arrestu forma parte de la denomada operación 'Arpon'.

CSIF, FE-CCOO y SUATEA convoquen una concentración mañana miércoles dos d’avientu, a les 17.30 énte la Xunta Xeneral del Principáu. Los sindicatos d’enseñanza quieren denunciar que la Llei d’Evaluación ye discriminatoria y apelen al “sentíu de la responsabilidá” de los partíos representaos nel Parlamentu.

La directora xeneral de Salú Pública del Principáu d'Asturies, Amelia González, indicó güei en rueda prensa que'l Serviciu de Salú del Principáu (Sespa) calcula unos 107 nuevos casos d'infeición del virus del VIH/SIDA na comunidá no que va del 2009, y defendió l'usu del condón pa evitar los contaxos, que van n'aumentu.

El Foru d'Urbanismu Críticu d'Uviéu, en collaboración col Conseyu de la Mocedá del Principáu, organizará los díes 3 y 4 d'avientu dos nueches de conciertos gratis, que baxo'l títulu 'Rock & Gas', reivindicarán un usu cultural de l'antigua Fábrica de Gas d'Uviéu que daría "un emburrión a la candidatura de la ciudá a la capitalidá europea de la cultural nel 2016".

Asina lo aseguró güei en rueda prensa'l voceru del Foru d'Urbanismu Críticu, Diego Díaz, qu'esplicó que la Fábrica de Gas podía ser "la tercer pata del triángulu asturianu formáu por La Llaboral y el Niemeyer".

La obra “Del romanticismu al rexonalismu: escritores carlistes na lliteratura asturiana” de Javier Cubero de Vicente, resultó ganadora del segundu premiu d’ensayu y trabayos d’investigación “Fierro Botas”, que concede’l Conceyu de Xixón al traviés de la Conceyalía de Cultura Tradicional y Llingua Asturiana.

Los sindicatos y asociaciones educatives inxeríes dientro de la plataforma Queremos Galego, vienen d’anunciar que namás que’l Gobiernu de la Xunta de Galicia, en manos del PP, derogue’l decretu del gallegu aprobáu na llexislatura anterior, convocarán una fuelga en toles etapes educatives y nel enseñu universitariu.

La sala de lo Contenciosu Alministrativu del Tribunal Superior d’Asturies vien de da-y la razón al sindicatu educativu SUATEA contra la resolución de la Conseyería d’Educación del 27 de marzu de 2009, que se declara nula por vulnerar el drechu de fuelga. Según el Sindicatu, la resolución fixaba nos servicios mínimos abusivos y tenía como fin impidir que’l profesoráu exercitara’l so drechu constitucional a la fuelga.

El voceru de Cultura del Grupu Socialista de les Cortes d'Aragón, Carlos Álvarez, tamién coordinador de la Ponencia parlamentaria a la Llei de Llingües, afirmó guei que los socialistes tán dispuestos a "dialogar sobre too, prácticamente", pero remarcó que'l PSOE defende la denomación del aragonés y catalán como tales.

El primer ministru d'Escocia, Alex Salmond, publicó esti llunes los detalles d'un referendu sobre la independencia escocesa. Salmond, que dirixe'l Partíu Nacional d'Escocia (SNP), afirmó que sólo la independencia daría "una collaboración d'iguales propia del sieglu XXI ente Escocia y Inglaterra". El llibru blancu, tituláu 'La to escocia, la to voz', allana'l camín pa que s'adopte un proyectu de llei a primeros del próximu añu y se dea la votación nunos doce meses.

El Serviciu de Normalización Llingüística del Ayuntamientu de Cangas del Narcea zarrará'l próximu vienres, 11 d'avientu, el plazu de presentación d'obres del so VII Concursu de Relatos Cortos en llingua asturiana normativa o asturianu occidental.

Los responsables del mesmu ficieron la pasada selmana un llamáu a la participación nesti certame, pa incrementar el númberu d'orixinales que se presenten nes dos próximes selmanes.