Toles formaciones con representación nel Congresu, a esceición del PP y d’UPyD, apoyaron una moción presentada por ERC que respalda’l modelu llingüísticu catalán. La votación vien precedida pola decisión del TSX de Catalunya.
 

L’etnógrafu y folclorista xixonés Daniel García de la Cuesta va recibir esti sábadu'l ‘Pegoyu Asturianu’, premiu que concede’l programa de promoción cultural ‘Luces de ciudad’. Na gala va actuar xunto coles sos bandes Zapica y De Mandilín.
 

El conseyeru de Facienda y Sector Públicu, Ramón del Riego, aseguró na Xunta Xeneral que la “herencia recibida” va obligar al Gobiernu a facer axustes nuevos. Tampoco va permitir un descensu de los impuestos.
 

La Coordinadora Ecoloxista d’Asturies denunció ante la Fiscalía de Mediu Ambiente y otros organismos la esistencia d’otru basureru illegal nel país. Ésti ta en Quintueles y acueye los residuos de construcción d’una empresa de contenedores.
 

La Fundación de Turismu de la Mancomunidá de la Sidra y el Conceyu de Nava, en collaboración cola Agrupación de Cazadores de Nava, ufren visites guiaes pa presenciar en Peñamayor los berros de los venaos. L’actividá ye de baldre.
 

El 13 de setiembre del 2007, l’asamblea xeneral de la ONX aprobó la Declaración sobre los Derechos de los Pueblos Indíxenes. La Coordinadora Asturiana d’ONGD va celebrar esta efémeride con un actu frente al Teatru Campoamor d'Uviéu.
 

L’españíu d’un fornu de fusión d’una planta de residuos nucleares en CENTRACO, industria asitiada cerca de Nimes (Occitània), provocó la muerte d’una persona. Les autoridaes franceses confirmaron que nun hai peligru de radioactividá.
 

La Unión de Sectoriales Agrarias (Usaga) propón la creación d’una Indicación Xeográfica Protexida (IXP) pa la lleche asturiano. D’esta forma garantizaríase la so procedencia nunos tiempos de falta de seguridá nel orixe del productu.
 

Bloque por Asturies-UNA de Gozón propón que los gozoniegos puedan participar na ellaboración de los presupuestos municipales. Pa ello pide la división del conceyu en trés árees xeográfiques que dispongan d’una asamblea ciudadana.