Bloque por Asturies-UNA de Gozón apuesta por unos presupuestos participativos pal 2012

Bloque por Asturies-UNA de Gozón propón que los gozoniegos puedan participar na ellaboración de los presupuestos municipales. Pa ello pide la división del conceyu en trés árees xeográfiques que dispongan d’una asamblea ciudadana.
 
“Énte l’entamu del cursu políticu nuevu y, n’especial, énte l’aprobación necesaria de los presupuestos municipales pal añu 2012, la coalición Bloque por Asturies-UNA de Gozón, depués de comprobar la incapacidá que tien el gobiernu municipal pa sacar alantre los presupuestos municipales y, sobre manera, depués de decatase de la inaccesibilidá y ‘acorazamientu’ de los dineros públicos respeuto a los contribuyentes, propón que sían los propios ciudadanos del conceyu los que participen de forma direuta na ellaboración de los presupuestos municipales pa l’añu qu’entra”, asegura la formación nacionalista. Pa ello, considera necesario la división del conceyu en trés árees xeográfiques qu’acueyen una asamblea de ciudadanos caúna na que tolos vecinos “puedan participar, debatir y decidir sobre’l diseñu de les partíes económiques que constituyan el presupuestu municipal”.
 
El Plenu sería, darréu, l’encargáu d’aprobar “les cuentes feches polos propios gozoniegos y gozoniegues”, esplica’l Bloque por Asturies-Unidá Nacionalista Asturiana (UNA) llocal, que considera que “d’esta manera garantizaríase la tresparencia y la eficacia na xestión económica municipal, amás, de la participación democrática de tolos ciudadanos y ciudadanes”.