Usaga propón la creación d'una IXP pa la lleche asturiano

La Unión de Sectoriales Agrarias (Usaga) propón la creación d’una Indicación Xeográfica Protexida (IXP) pa la lleche asturiano. D’esta forma garantizaríase la so procedencia nunos tiempos de falta de seguridá nel orixe del productu.
 
Según señala’l sindicatu de creación nueva, crear la marca ‘Lleche d’Asturies’ otorgaría a la lleche del país la calidá que se merez y garantizaría la so llegada al consumidor final, algamando que los ciudadanos y los productores se beneficie de forma mutua: los primeros gracies a un control qu'avala la procedencia del productu que consume, y los segundos consiguiendo un preciu xustu, que satisfaga tolos gastos que conlleva caltener la calidá d'esi productu. Dende Usaga consideren qu'esiste una cantidá considerable de productu con dudosa procedencia xeográfica si se tien en cuenta que la producción final de lleche n'Asturies, na campaña 2010-2011, foi de 537.660 tonelaes y la cuota láctea de 612.921 tonelaes, y que nel Estáu español prodúcense 6.000.000 de tonelaes y consúmense 9.000.000.
 
El coleutivu faise ecu de les pallabres del so coordinador estatal, José Manuel de las Heras, qu'hai unos díes destacaba que la falta de seguridá na procedencia de los productos ye evidente cuando dalgunes marques destaquen na so etiqueta ‘envasáu en’ y non siempre acompañáu del ‘producíu en’. De las Hera señala que “l'aceptación de les autoridaes y de la industria mientres décades” del fechu de qu'España sía l’estáu “de destín de toles lleches sobrantes” n'otros territorios, sobre manera de les peores lleches franceses, que lleguen al mercáu “a precios perbaxo de los costos de producción d'equí y d’ellí, llevónos onde tamos”.