El sábadu 1 d'ochobre va tener llugar en Santolaya (Morcín) el IV Concursu-Esposición Nacional del Gochu Asturcelta. 135 exemplares procedentes de 16 ganaderíes van participar nesta edición, na que ta previsto'l repartu de 100 quilos de picadillu.
 

Ramón del Riego aconceyó esti llunes en Madrid col secretariu d’Estáu de Facienda y Presupuestos. El conseyeru de Facienda y Sector Públicu pidió-y un plan d’aplazamientu de cuatro años “p’absorber el déficit escesivu heredáu del Gobiernu anterior”.
 

El paru que van celebrar tolos xueves y llunes los pilotos d’Air Europa a partir del día 22 va afeutar a dos de los cuatro vuelos diarios que xunen Asturies y Madrid. Por contra, nun va perxudicar a les conexiones con Barcelona, París y Canarias.
 

Antonio Pino, secretariu xeneral de CO OO d’Asturies, recordó esti llunes que n’Asturies permanecen 64 convenios bloquiaos. Pa iguar esta situación, qu’afeuta a 37.000 trabayadores, ta acabante de pidir un aconceyamientu con García Vigón.
 

Nueva York ta siendo, nes hores últimes, sede de delles reuniones na que la diplomacia internacional quier frenar la reconocencia de Palestina como estáu. La intención ye impedir qu’esta selmana se vote esti tema na sede de la ONX.
 

Esti añu la seronda va entrar el vienres, 23 de setiembre, a les 11.05 hores y va allargase hasta’l 22 d’avientu, según avanzó l’Instituto Geográfico Nacional. En total, la estación va tener una duración de 89 díes y 20 hores.
 

Ana Isabel Álvarez González, conseyera d’Educación, señaló nel pieslle de la UABRA que l’empeñu del so equipu va ser ver medrar l’asturianu con “pasos curtios, pero seguros”. Ana Cano reclamó otra vuelta la especialidá de Llingua Asturiana.
 

Col cursu yá entamáu, la Conseyería d’Educación tovía tien por axudicar 24 places d’asturianu y 4 de gallego-asturianu en Primaria. Esta situación dexa a un bon númbero d’escolinos y escolines ensin poder recibir clase de la so llingua materna.
 

L’ex voceru de Batasuna, Arnaldo Otegui, y l'ex secretariu xeneral del sindicatu LAB, Rafael Díez Usabiaga, foron condenaos esti vienres a diez años de cárcel pola Audiencia Nacional. El tribunal considéralos dirixentes d’ETA.