Tarde de Lliteratura Infantil y Xuvenil en Xixón

Esti llunes 12 de setiembre'l certame lliterariu "L'Arribada" dedicó-y una xornada completa a la Lliteratura Infantil y Xuvenil, con actividaes que fueron dende les esposiciones, les presentaciones de llibros y los percorríos peles obres lliteraries d'autores del xéneru.

La tarde lliteraria entamó a les 17.00 hores cola inaguración de la esposición dedicada al álbum ilustráu "Deva y yo", del que ye autor Vicente García Oliva ya ilustradora Belén García Montoya "Begmont", y que podrá vese na sala 3 del Centru de Cultura Antiguu Institutu de Xixón hasta'l próximu día 30 de setiembre.
De siguío, y yá nel patiu del Institutu, Humberto Gonzali, organizador de l'Arribada, moderó dos alcuentros empobinaos a remembrar dalgunes de les obres más importantes de la lliteratura n'asturianu pa la reciella: "Poemes pa neños" del académicu de númberu y maestru Urbano Rodríguez y les obres de recoyida del folclor infantil ellaborada pol escritor Xicu Monteserín.
Pela so parte les novedaes editoriales del presente añu tuvieron representaes pola presentación del yá mentáu "Deva y yo" editáu por Pintar-Pintar y "L'árbol de la verdá" segundu númberu de la colección Camín de Bree qu'entama Suburbia Ediciones. Na presentación d'esti últimu tuvieron presentes, amás de la editora Silvia Cosío, los autores del llibru Xurde Fernández y Marián García.
Pa cabu la ilustradora Mar Buelga faló del so oficiu de poner color ya imaxen a los cuentos, conferencia a la que siguió la presentación del llibru "¿A qué nun sabes lo que pasó?" de María Xesús Rodríguez Guillón.
 
Pues ver la Galería de semeyes na nuestra Páxina de Facebook.