Del Riego asegura que “la herencia recibida” va obligar al Gobiernu a facer axustes nuevos

El conseyeru de Facienda y Sector Públicu, Ramón del Riego, aseguró na Xunta Xeneral que la “herencia recibida” va obligar al Gobiernu a facer axustes nuevos. Tampoco va permitir un descensu de los impuestos.
 
Del Riego, na so comparecencia na Comisión de la Xunta Xeneral a petición propia, afirmó que ye necesario “recortar nel segundu semestre los escesos fechos nel primeru”, en referencia a la xestión del Gobiernu de Vicente Álvarez Areces. “Les piedres atopaes nel camín son de tal calibre que necesitamos un análisis nuevu más fondu de les nueses posiciones iniciales. Tamos perinteresaos en solucionar la herencia recibida”, dixo del Riego, qu’insistió en que dende que llegó al Gobiernu alcontró delles “sorpreses”. Asina refirióse a la “apaición, nun caxón, de factures del ámbitu sanitario por más de 211 millones de euros imputaos nuna cuenta estrapresupuestaria” o a les “cuentes fenomenales” unviaes pol Executivu anterior al ministeriu nes qu’afayó la superación del déficit establecíu. “L’endeudamientu al que vamos dirixíos a 31 d’avientu ye del 2,7 por cientu, poro, esi endeudamientu tien que ser correxíu y la nuesa prioridá ye llograr que sía del 1,3 por cientu del PIB rexonal”, señaló.
 
Nesi sen, insistió en que’l Gobiernu d’Areces nun dixo la verdá respeuto a les cuentes porque aplicó una “campaña constante d’ocultación de la deuda” y una xestión “ineficiente, con comportamientos irresponsables y desviaciones significatives” que, na so opinón, llevó a una situación de “descontrol y desorden de las finances”. Na so intervención, Del Riego nun quixo aclarar si diba a aplicar l’Impuestu sobre’l Patrimoniu nel casu de que lu aprobara’l Gobiernu Estatal. Otra manera, el conseyeru afirmó que la situación cola que s’atopó al llegar al Executivu impide una baxada de los impuestos l’añu qu’entra.