La Coordinadora d’ONGD celebra’l cuartu aniversariu de la carta de Derechos de los Pueblos Indíxenes

El 13 de setiembre del 2007, l’asamblea xeneral de la ONX aprobó la Declaración sobre los Derechos de los Pueblos Indíxenes. La Coordinadora Asturiana d’ONGD va celebrar esta efémeride con un actu frente al Teatru Campoamor d'Uviéu.
 
L’aprobación de la Declaración sobre los Derechos de los Pueblos Indíxenes “ye un fechu d’importancia grande pa los pueblos históricamente negaos y discriminaos, integraos por más de 370 millones de persones en tol mundu”, señalen dende la Coordinadora. Ésta Declaración tuvo nel so día l’apoyu de 144 países, mentes que 4 votaron en contra y 11 astuviéronse. Sicasí, col pasu del tiempu, dalgunos estaos que nun tuvieron a favor del documentu de primeres, como Australia, Nueva Zelanda, Canadá, Estaos Xuníos, Colombia y Samoa, terminaron por aceptalu. “Trátase d’un documentu completu que trata temes como los derechos coleutivos, los derechos culturales y la identidá, y los derechos a la salú, la educación y l’emplegu, ente otros. La Declaración enfatiza’l derechu de los pueblos indíxenes de preservar y fortalecer les sos instituciones propies, cultures y tradiciones, y de trabayar pol so desarrollu d’alcuerdu a les sos aspiraciones y necesidaes. La Declaración, ensin dulda, ayudará a los pueblos indíxenes nos so esfuercios por combatir la discriminación y el racismu”, señalen dende la Organización de Naciones Xuníes (ONX).
 
Cuatro años depués, la Coordinadora quier recordar la importancia de la carta de Derechos Indíxenes con una actu lúdicu y reivindicativu frente al Teatru Campoamor d’Uviéu, a partir de les 19 hores. Nél va participar el grupu de baille Achalay Danzay.