El diputáu d’IX-BA-LV, Francisco García Valledor, señaló qu’“hai que disolver IU, el Bloque y Los Verdes pa crear una fuerza qu’axunte a tola izquierda alternativa al PSOE”, una nueva fuerza política “d’izquierdes, asturianista, ecoloxista, republicana y altermundista”, llamando amás a UNA y a Izquierda Republicana a participar nel proyectu. Dende la federación nacionalista respuenden que "yá existe una fuerza asturiana, ecoloxista y d’izquierdes, la UNA”.

El coste de la vivienda n'alquiler n'España baxó un 0,39% demientres el mes de febreru sobre'l mes anterior y acumula yá una baxada del 9% nel últimu añu, tres rexistrar ocho meses siguíos de cayíes, según los datos ofrecíos pol portal inmobiliariu y domésticu facilisimo.com. N'Asturies, el preciu descendió un 0,67 por cientu.

L’Sporting de Xixón algamó’l so segundu triunfu consecutivu nun partíu frente al Deportivo de La Coruña nel que l’árbitru señaló tres penaltis, dos d’ellos contra los xixoneses. Sicasí, estos fueron quién a superar a los gallegos, lo que dexa al Sporting con 33 puntos nel puestu decimuprimeru de la tabla.

La misión STS-119 Discovery fixo un despegue espectacular a les 00:43 (GMT) de güei. L'orbitador de la NASA va camín de la Estación Espacial col enfotu d'instala-y un xuegu de paneles solares, que sumáu a los que yá tán furrulando nel complexu, va incrementar la enerxía llétrico disponible y permitir espediciones más numberoses. Si esta misión termina con ésitu 6 astronautes, en cuenta de 3, van poder residir de forma permanente na ISS.

El pasáu mes de febreru aprobóse’l Plan de Normalización L.lingüística de Cangas del Narcea. Darréu d’ello saltó la polémica por cuenta de la posibilidá que recueye’l documentu de valorar el conocimientu de la nuesa llingua a la hora d’optar a un puesto de trabayu n’alministración local. Asturies.com faló con Mónica Rodríguez Riesgo, responsable del Serviciu de Normalización L.linguística del Conceyu de Cangas.

La costa del Principáu d'Asturies cuenta con cuatro zones con altu potencial d'aprovechamientu enerxéticu de les foles, toes elles asitiaes nel occidente asturianu. Son concretamente les zones Tapia-El Franco; El Franco-Cuaña; Navia-Valdés y Valdés.
 

El conceyal d'Urbanismu de Xixón, Pedro Sanjurjo, defendió güei que tanto horros y paneres son oxetu de treslláu al tratase de bienes muebles y tar "mutilaos y adulteraos" en dalgunos casos. Asina lo dixo tres criticar el PP nel Plenu la desapaición d'estos elementos etnográficos nos terrenos mercaos pola Zona d'Actividaes Lloxístiques y Industriales (Zalia).
 

La Espedición 18 de la Estación Espacial Internacional tuvo qu'abellugase más de 10 minutos dientro de la nave Soyuz énte'l peligru de choque col restu d'un satélite vieyu convertíu en chatarra espacial. Les midíes de precaución tomáronse namás llevantase los astronautes al entrar dientro del rangu de lo posible'l riesgu de colisión.

El presidente de DuPont España y Portugal y director xeneral de DuPont Ibérica, Enrique Macián, aseguró güei n'Avilés, que la multinacional "nun tien nenguna intención de colar d'Asturies", y añadió que nes instalaciones asturianes desarrolláronse inversiones mui importantes que de querer abandonar la rexón nun diben tener nengún sen. "Si ta invirtiendo 120 millones d'euros nos dos últimos años, ta claro, que nun ye pa colar mañana", dixo.