L’Asociación Furmientu entama les sos “Xornadas de Cultura Tradicional de Zamora”, dedicaes al so patrimoniu llingüísticu, caracterizáu según Furmientu “pola súa riqueza y variedá, como amuestra la  presencia de tres llenguas romances diferentes nel sou territoriu: castellanu, llionés y gallegu”. Nelles el filólogu asturianu Fernando Álvarez-Balbuena va falar de "Las falas zamoranas y llionesas nel conxuntu del dominiu  asturllionés."

La Xunta de Personal Docente non Universitariu, integrada polos sindicatos Suatea, FETE-UXT, CC.OO, ANPE y CSIF, confirmó güei nun conceyu de la permanente la convocatoria de fuelga en tolos centros públicos d'enseñanza del Principáu pal próximu 1 d'abril, según confirmaron a Europa Press fontes sindicales. Los integrantes de la Xunta tienen previsto anunciar mañana nueves movilizaciones que se van desarrollar dempués del 1 d'abril.
 

L'Academia de la Llingua Asturiana acaba de fallar el so concursu de lliteratura infantil y xuvenil, "Llectures pa rapazos", correspondiente al añu 2009. El xuráu decidió premiar nesta ocasión la novela curtia "Pelegrinos del abismu", de la que ye autor l'escritor maliayu Lluís Portal Hevia.
 

La Escuela de Maxisteriu convocó pal próximu martes 31 de marzu, a les 16.30 hores, la Xunta d'Escuela monográfica na que se someterá a votación la propuesta de crear una Mención de Llingua Asturiana, según fontes universitaries. La Comisión de Docencia del centru universitariu aconceyóse esta mañana y decidióse por esta fecha, pese a que de primeres taba previsto que la sesión tuviere llugar esta mesma selmana.

El Plenu de la Xunta Xeneral del Principáu d'Asturies (XXPA) aprobó por unanimidá una proposición non de llei del PP na que pide al Gobiernu estatal la necesidá d'aprobar, nel marcu de la llexislación sobre atribuciones profesionales, la regulación esplícita de la Inxeniería y Inxeniería Técnica n'Informática n'España, asina como la so consideranza n'igualdá de condiciones que'l restu de les inxeneríes.

La Sociedá Mista de Xestión de Suelu del Principáu (Soxepsa) diz ser "dafechu ayena al Plan Parcial de Cabueñes" y niega que l'ex arquitectu municipal de Xixón, Ovidio Blanco, forme parte de la so plantiya. Según la sociedá, el técnicu "tien soscritu con Soxepsa un contratu temporal de serviciu como profesional". Ovidio Blanco algamó un beneficiu de más de 600.000 euros al revender una finca afeutada pol Plan Parcial de Cabueñes. L'asuntu yá ta en manes de la Fiscalía.

El conceyu de Cangas entama la so VIII Selmana Cultural ente’l 23 y el 28 de marzu. Esta edición va dedicase al escritor autodidacta de Mieldes, Basilio Garrido, que cunta con obres escrites  n'asturianu occidental y castellán, poles que foi yá homenaxeáu nel II Alcuentru d'escritores n'asturianu occidental nel añu 2006. Recitales, presentaciones de llibros, teatru y conciertos conformen la programación d’esti eventu.

Esti llunes 23 de marzu a les 5 de la tarde entama en Llanes un cursu d'asturianu oriental, tituláu "Variedaes Llingüísticas nel Oriente d'Asturias. La h.abla oriental". El cursu ta organizáu pol Centru de Profesoráu y de Recursos del Oriente (CPR de Llanes) y pol Seminariu de Filoloxía Asturiana de la Universidá d'Uviéu. Les clases danse nel propiu CPR de Llanes.

El conceyal de Cooperación, Cultura Tradicional y Política Llingüística del Ayuntamientu de Xixón, Jesús Montes Estrada, presentó güei la convocatoria pa la segunda edición del 'Premiu d'ensayu y trabayos d'investigación Fierro Botas', que destaca los testos d'análisis sobre la rellación de la llingua asturiana y el desarrollu sociocultural de la ciudá y del conxuntu d'Asturies.

Los asturianos fixeron ún de los peores partíos d’esta temporada, regalando-y los tres puntos al que ye’l penúltimu clasificáu de la Lliga, el Numancia de Soria. Un penalti mui inocente y un error defensivu de traca tuvieron como consecuencia los dos goles numantinos y la derrota del Sporting, que vuelve a metese nuna situación a lo menos mui incómoda na tabla.