El director de DuPont Ibérica asegura que la multinacional "nun tien nenguna intención de colar d'Asturies"

|

El presidente de DuPont España y Portugal y director xeneral de DuPont Ibérica, Enrique Macián, aseguró güei n'Avilés, que la multinacional "nun tien nenguna intención de colar d'Asturies", y añadió que nes instalaciones asturianes desarrolláronse inversiones mui importantes que de querer abandonar la rexón nun diben tener nengún sen. "Si ta invirtiendo 120 millones d'euros nos dos últimos años, ta claro, que nun ye pa colar mañana", dixo.

Macián, que participó nun almuerzu empresarial n'Avilés organizáu pola Asociación de Jóvenes Empresarios, referíase a esti modelu al anunciu de la compañía de la pasada selmana na que comunicaba la intención de crear tres centros de servicios --ún n'Europa, otru n'Asia y n'EE.UU--, lo que va provocar que parte de los llabores qu'agora se desarrollaben nes instalaciones asturianes se treslladen a les del centru de la India.

Dixo que "esto nun ye preocupante porque esti centru entamó hai once años con 17 emplegaos y agora tien 300, siendo un referente mundial agora mesmo, polo que nun podemos pretender comer lo de tol mundu", afirmó. Asina, el director de DuPont Ibérica, quiso dexar claro qu'esta decisión nun va torgar de nenguna manera que la planta de Tamón siga siendo un referente de la multinacional n'Europa.

Amás, quiso esclariar que se teníen ocho grandes divisiones dientro de la planta asturiana, y "marcha pa la India la más mecánica y tresversal, pero van venir equí otres divisiones con más valor añadíu, polo que los 300 emplegaos van siguir", comentó.

Macián, que faló sobre diversos temes como la crisis, la filosofía empresarial y el futuru de DuPont, indicó que la idea de la multinacional ye tener en futuru "un gran centru financieru n'Europa, otru n'Asia y otru n'América".

"Con esto igual tengamos qu'anular el contratu con 15 o 20 contratistes, o igual non, pero lo que sí pueo dicir ye qu'a la planta asturiana van venir otros servicios non financieros, que nun pueo detallar güei", espunxo.

Dende dalgunos grupos políticos se criticó la última selmana que Dupont nun compensó la cuantía que'l Principáu-y dio nos sos entamos. Nesti sen, Macián apuntó que "cuando DuPont invirtió equí se fizo un estudiu sin les posibles ayudes, porque si nun yera rentable, con ayudes tampoco lo sería", comentó. "Y eses ayudes nun les diben dar equí, nun les diben dar en Cartaxena, Valencia, Irlanda o Luxemburgo", añadió.

A lo último, el presidente de DuPont Ibérica señaló que, a pesar de la crisis, na planta asturiana hai "tranquilidá". "El d'Asturies ye'l principal centru de servicios nel mundu, dao que tenemos cuatro plantes, que como ye normal tuvieron un baxón pola crisis, pero los trabayadores d'Asturies puen tar tranquilos, de momentu", acabó.

Contador Estadistiques