Los resultaos, condicionaos enforma pola illegalización de D3M y la francedura de la coalición PNV-EA, amuesen una suba de PSE y Aralar y faen posible que'l PNV dexe'l gobienu depués de cuasi 30 años.

El resultáu de les elecciones nel país vecín foron una sorpresa p'abondos qu'esperaben la repetición del bipartitu ente socialistes y nacionalistes. El PP gatuñó un escañu al BNG na Coruña y otru al PSOE en Pontevedra, colo qu'aseguró la mayoría absoluta.

La directora xeneral de Política Llingüística, Consuelo Vega, separtó la falta d’oficialidá de la llingua asturiana del peligru de desaparición que, según l’”Atles de les llingües en peligru del mundu” publicáu pola Unesco, tien esti idioma. Vega recordó que l’euskera sí ye oficial y tamién ta en peligru d’estinción.

Nuna nota unviada a Asturies.com, la Rede de Sericios de normalización Llingüística nos conceyos da anuncia de que busquen "persones que puean comunicase n’asturianu  y que a la vez tean capacitaes pa dirixir talleres de manualidaes, teatru, dibuxu, informática, deportes, música, etc.; o tamién  pa dar charres informatives (educación pa la salú, nueves tecnoloxíes, ecoloxía, arte, historia, etc) tanto pa neños y mozos como p’adultos.

Xunta Moza, estaya xuvenil de la Xunta pola defensa de la Llingua Asturiana, convoca dos clases d’asturianu na cai dientro de la campaña que ta llevando alantre contra la propuesta d’esclusión de la llingua asturiana de los futuros planes d’estudiu de maxisteriu. Esta protesta va facese los díes 3 y 5 de marzu a les 10:30 delantre de la Escuela de Maxisteriu d'Uviéu.

L’Sporting perdió’l so cuartu partíu consecutivu, esta vez en casa y frente a un rival directu na llucha pola permanencia, el Mallorca, nun encuentru nel que los asturianos tuvieron una primer media hora de bon xuegu y poco más. Esta nueva derrota mete al equipu xixonés na zona peligrosa de la tabla, a namás dos puntos del descensu.

La Conseyería de Cultura "acudirá la próxima selmana (4-6 de marzu) en Lisboa a 'Expolingua Portugal', una de les feries más importantes d'Europa, na que van presentase les principales novedaes na estaya de la didáctica y la enseñanza y aprendizaxe de llingües", según informa nuna nota de prensa. Asimesmo'l Gobiernu asturianu "aprovechará la so presencia pa presentar nel Institutu Cervantes una antoloxía de poesía portuguesa coordinada por Xuan Bello n'edición billingüe".

La estaya xuvenil de la Xunta pola Defensa de la Llingua Asturiana, Xunta Moza, entamó esta mañana una acción de protesta nel actu de toma de posesión de cargos universitarios n'Uviéu. Los militantes de la organización xunto a dellos estudiantes de maxisteriu repartieron octavilles informatives nes que se pedía "la dimisión inmediata de la directora de la Escuela Universitaria de Maxisteriu pola so propuesta d’esclusión de la llingua asturiana de los nuevos planes d’estudiu".

La Conseyería de Mediu Rural y Pesca del Principáu algamó garantíes bastantes pa asegurar qu'empreses llecheres asturianes sustituyan al Grupu Pascual na recoyida de lleche, tres la decisión d'esta empresa de nun recoyer n'Asturies de magar el próximu 1 de marzu. Los cerca de 13 millones de kilos de lleche que'l Grupu Pascual recoyía n'Asturies, poro, asumíos por otros compradores.
 

El nome de los ganadores de la 13ª edición de los Premios de la Música asoleyóse güei en Madrid. Na categoría al meyor cantar n'asturianu la ganadora foi Esther Fonseca por "Negra".

Fonseca impúnxose perriba de los otros dos finalistes, La Bandina, y Músicos pola Oficialidá. La ceremonia d'entrega va ser el 12 de marzu nel Palaciu de Congresos Manuel Rojas de Badayoz. Pues consultar  premiaos en toles categoríes na web de los Premios de la Música.