Sanjurjo xustifica'l treslláu d'horros y la so descatalogación al perder el so usu orixinal y tar "mutilaos y adulteraos"

El conceyal d'Urbanismu de Xixón, Pedro Sanjurjo, defendió güei que tanto horros y paneres son oxetu de treslláu al tratase de bienes muebles y tar "mutilaos y adulteraos" en dalgunos casos. Asina lo dixo tres criticar el PP nel Plenu la desapaición d'estos elementos etnográficos nos terrenos mercaos pola Zona d'Actividaes Lloxístiques y Industriales (Zalia).
 
Tamién indicó que'l Catálogu Urbanísticu, que pasa de los 643 elementos protexíos del actual a 2.727 elementos, recueye más de 1.000 elementos ente horros y paneres con utilidá social históricamente rellacionada cola economía agraria y añadió que cuando pierden esi usu cuerren riesgu de desapaición.
 
Según esplicó l'edil, la llei diz que ye preferible que sigan calteniendo esi usu. Sicasí, apuntó qu'una gran parte sufrieron "series mutilaciones y adulteraciones", como que munchos tornaren en garaxes. Por esti motivu, manifestó que la Zalia pidió la so descatalogación nesos casos, dalgo compartíu pola Conseyería de Cultura.
 
En cuanto a la destrucción del arboláu del parque de l'Atalía, de la que'l PP acusa al equipu de Gobiernu, señaló que cada árbol tien un tiempu de "llende". Amás, añadió que los árboles de l'Atalía nun son d'una especie de "altu valor", dende'l puntu de vista ecolóxicu. Nesti sen, añadió qu'al tratase de chopos, tienen asociada una enfermedá que los va carcomiendo pel interior, y acaba siendo "un peligru" pa los viandantes, polo que cualquier ventolera pue valtalos. Amás, apuntó que la zona ta suxeta al encharcamientu al tar nuna cota inferior a l'avenida de Juan Carlos I.
 
Sobre esti puntu, el PP llamentó que l'equipu de Gobiernu incumpla la normtiva, al afirmar que los movimientos de tierra onde exista arboláu deberán tar protexíos. El conceyal 'popular' Pedro Muñiz destacó'l gran arboláu con más de 40 años d'antigüedá del parque de l'Atalía y acusó al equipu de Gobiernu de "matar a los árboles".
 
En cuanto al Catálogu, Muñiz agradeció a les asociaciones de vecinos de la zona rural la collaboración col equipu redactor del documentu pa la inclusión de nuevos elementos de patrimoniu natural. Tamién señaló que'l resultáu del catálogu ye un "xustu" y equilibru ente los derechos de los propietarios y la proteición del patrimoniu.
 
Sobre l'informe de les alegaciones presentaes al mesmu, que s'aprobó por unanimidá, va contemplar 2.272 elementos protexíos tres almitise 146 alegaciones. En total, presentáronse 158 alegaciones, a les que se sumen cuantro fuera de plazu. L'edil d'Urbanismu destacó qu'un 71 por cientu de les alegaciones s'estimaron total o parcialmente. Sanjurjo destacó'l trabayu "llaboriosu" realizáu y la "creiente sensibilidá ciudadana".
 
Ente otres coses, s'incorporaron elementos de patrimoniu d'arquitectura militar y tamién bienes muebles y oxetos enantes non algamaos. Tamién s'incluyó una nueva categoría de proteición, que ye'l nivel de proteición ambiental documental, pa preservar el recuerdu de viviendes de tipoloxía obrera.
 
 Amás, existen 18 edificios que pol so asitiamientu, onde ta prevista una crecida, va obligase a facer un estudiu de detalle de la volumetría pa evitar l'impautu visual de les cases llenderes. Tamién se va facer un Plan Especial pal ámbitu de Mina La Camocha.